Kuminah khua la vawt tak tak lo

Thlasik khaw vawh hun a ni a, khua pawh a vawt ta. Mahse vawt tak chu a la ni lo a, thlasik khaw vawt vin vur a la awm lo.
Directorate of Science & Technology enkawl State Meteorological Centre-a an chhinchhiah danin, tun thlaah hian ni 11 thleng khan a vawh ber laiin 13 degree Celcius a ni a, hei aia a vawh lai a la awm lo. November-ah khan a vawh ber laiin 15 degree Celcius a ni.
Lum leh vawt tehnaah 13 degree Celcius hi a vawt vak lo a, 10 hnuai lam hi Mizoramah chuan a vawt viau.
State Meteorological Centre chhinchhiahna enin Aizawl vawh ber laiin 2.7 degree Celcius a ni a, 2017 January ni 13 kha a ni. Heng te hi chu vawt tak a ni a, chumi nena khaikhin chuan kumin November leh December chu a la vawt vak rih lo.
Mizoram vawh ber lai hi January vel hi a ni zawk reng reng a, February a la vawh viau kum a awm bawk. November leh December hi a vawh ber thla a ni lo. Amaherawhchu, kumin hi khaw vawh vak loh kum a ni dawn nge, January pawh kha a vawt vak lo, kumina Aizawl vawh ber laiin January ni 12 khan 10 degree Celcius a kawk a, kum dang January-ah chuan 10 hnuai a tam. Kuminah September-ah pawh khua a la lum a, favang khaw thengthaw pawh a awm lo tih theih turin khua a lum uap chuar a ni kha.
Tun hnaiah ruah a tam lo a, December ni 1 kha ruah sur hnuhnun ber a ni rih. Khami ni khan ruah hi mm 18 a sur a, tam tia sawi tur chu a ni lo. November-ah khan ruah a sur meuh tawh lo a, thla tluana sur kha mm 20.2 chauh a ni. October-ah pawh a tam vak lo a, mm 82.8 a sur.