Kuminah malaria thihpui 5 Ramri hrulah hmu tam zual

Kuminah Mizoramah malaria thihpui mi 5 awmin Lawngtlai district ami vek an ni a. Myanmar leh Bangladesh ramri hrula chengte ah hmuhchhuah a tam zual nia sawi a ni.
Health & FW department hnuaia National Vector Borne Disease Control Programme (NVBDCP) chu Thawhlehni khan an thukhawm a. H&FW principal director Dr Vanlalsawma leh RoH&FW Imphal addl senior regional director Dr NI Singh ten an hmanpui.
Kumin January atanga July chhunga malaria, dengue leh Chikungunya-a Mizoram dinhmun an thlirlet a. Hemi chhung hian Mizoramah malaria vei 12290 awmin, chu’ng zinga 6349 chu PF an ni. Malaria avangin mi 5-in nunna chan tawhin, an vaiin Lawngtlai district ami vek an ni.
Kumin chhung hian kumdang zawng aiin Malaria PV a pung nia report a ni a. Dengue vei hmuh chhuah tawh zat chu 267 niin, Chikungunya vei mi 3 hmuhchhuah an ni tawh bawk.
Mizoramah district pali – Lawngtlai, Lunglei, Mamit leh Siaha chu malaria tam zual bikna an ni a; a bikin international border – Bangladesh leh Myanmar ramri hrulah malaria kai hi an tam zual nia report a ni.
NVBDCP hnuaiah hian malaria natna laka invenna – thosilen damdawia chiah sa sem, thosilen pangngai damdawia chiah sak leh chenna in chhung thosi hloa kah kalpui mek a ni.