Kumin hian Mizoramah TB natna thihpui mi 107 an awm tawh a, TB venna la tur zingah la duh an awm.
National Health Mission hnuaia National TB Elimination Programme hotute sawi danin, kuminah December 20 thleng khan Mizoramah TB kai rinhlelh 14273 endik atangin TB kai 2195 hmuhchhuah an ni tawh a. TB kai zawn chhuah hna (active case finding) chu district hrang hranga kalpui niin, refugee camp, jail, home leh TB kai awlsam theihna hmun leh khaw hrang hrang tlawhin, TB kai awm leh awm loh endik a ni.
Active case finding-ah hian mi 68351 endikah 701 chu a bika enfiah a ni a, TB kai 7 hmuhchhuah an ni. TB venna damdawi (TB Preventive Therapy – TPT) chu mi 1222-in an la mek. TB venna damdawi la tur hian Chuap TB kai, a hrik hmuh chhuah zingah an chenpui chhungkua endik an ni a. An chhhungkuaah kum 5 leh a hnuailam zawng chu TB venna damdawi pek ngei ngei ngai (compulsory) an ni a. Kum 5 chunglam chin chu endik an nih hnuah an taksaah TB hrik an pai loh chuan TB venna damdawi hi pek tur an ni.
HIV kai, TB hrik pailote chuan TB venna damdawi an lak ngei a ngai a. Chutihlaiin, TB venna damdawi la thei zingah la duh lo leh nu leh paten an fate laktir duh lo an awm teuh avangin TPT pek chungchangah harsatna lian tak ala awm tih sawi a ni.
TB damlo tanpuina scheme, community support hnuaiah tanpuitu 279 an awm mek a. TB damlo pakhat hi thlakhatah Rs. 700 hmanga tanpui theih niin, sumfaia pe loin chaw tha – buh, artui, dal, tel, bawnghnute leisak thin an ni. TB kai damlote hi an inenkawl hun chhung thla 6 thleng emaw a aia rei pawh tanpui theih an ni.
-- Advertisement --
Kum 2023 chhunga TB kai
hmuhchhuah leh a kaihhnawih:
4District tina TB kai hmuhchhuah: Aizawl – 1549, Champhai – 98, Kolasib – 139, Lawngtlai – 88, Lunglei – 140, Mamit – 27, Siaha – 105, Serchhip – 49.
4TB vanga thi mi 107 zingah Aizawl district ami an tam ber a, mi 70 an thi a ni.
4TB leh HIV kai kawp mi 267 hmuhchhuah an ni a. Hei hi TB kai hmuhchhuah atangin zaa 12 a ni.
4Multi Drug Resistant TB (MDR-TB) ni tawh mi 119 hmuhchhuah an ni.
4TB kai hmuhchhuah zingah mi 98 chu zunthlum an ni tih hriat a ni a. Mi 588 chu vaihlo kaihnawih ti an ni.
4TB kai, damdawia enkawla tihdam zat chu, he natna kai hmuhchhuah zat atangin zaa 81.5 a ni.