Kuminah tualchhung zu man hnem tawh

Ruihhlo hluar thu hian zu thawm a hliah khuh a ni mai thei a, zu hi a hluar tia sawi ngam a ni lo a nih pawhin a tam thu-ah chuan a tam. Kuminah pawh an man hnem leh tawh.
Mizoram Excise & Narcotics (MEN) department-in kuminah April thla thleng khan tualchhung zu (rakzu) litre 23,638.750 an man tawh a, thla li chhunga manah chuan hei hi a tam tham khawp mai. Nikum khan litre 59694.420 an man a, nikum kum tluana an man zat atanga tehin kumin kum tir thla li chhunga an man hi a tam tham viau mai.
An chhinchhiahna enin, kuminah rakzu bakah zu bilh lai pawh an man leh nual tawh a, thla li chhungin tin 57,799 an man tawh. Dawidim pawh kg 64.640 an man tawh a, zu siam nana hman bel 1009 an man tawh bawk.
Tunlaiin Aizawl leh a chhehvela tualchhung zu siamte an lian tia sawi thin a ni a, hmanrua leh a hmunhma lamah an thang a, an dehchhuah pawh a pung nia sawi a ni.
MEN department hotute chuan Aizawl hmun hrang hranga lian lem lova zu bilh kha, khatiang kha tunlaiah a ni tawh lo an ti a, zu siamna hmunah tam tham tak, lian tham takin an bilh a, chung chu hmun hrang hrangah an pe chhuak leh an ti.
Mizoram hmun dang daih, district dang daiha zu an mante pawh Aizawl bul vela mi a lo ni thin tih an sawi a, hmun hla tak takah Aizawl zu an lo man leh nawlh thin tih te an sawi.