Kuthnathawk inziaklut hnenah Cheng vbch 115 semchhuak tawh

Mizoram Building & Other Construction Workers Welfare Board chuan kum 2009-a a din hnu, tun thlengin Board hnuaia inziaklut inhlawhfa mi 162694 te hamthatna atan cheng vaibelchhe 115.6 a sem chhuak tawh.
Central Building & Other Construction Workers (CB&OCW) Advisory Board chairman V Srinivasa Naidu chu Mizoramah a lokal a, Ningani zan khan larsap Dr Hari Babu Kambhampati chu Raj Bhavan-ah a hmu a. Mizoram Labour, Employment, Skill Development & Entrepreneurship (LESDE) hotuten an tawiawm a ni.
LESDE hotute sawi danin, MB&OCWWB hi kum 2009 khan din a ni a. LESDE minister chu chairman niin, LESDE secretary chu vice chairman, LESDE director chu secretary a ni. Board member-ah hian central leh state sawrkar bakah Trade Union aiawhte an tel. An hnuaia inziaklutte tan hamthatna hrang hrang – children’s educational assistance, medical assistance, disability benefits, death benefits leh a dangte an nei a. Board din tirh atanga tun thlengin cheng vaibelchhe 231.82 a hmu tawh a, inhlawhfa mi 162694 hamthatna atan cheng vbch. 115.6 a sem chhuak tawh. Sawrkar kum liamta (2022- 2023) chhung khan MB&OCWWB chhiah (cess) hmuh leh sem chhuah hi kum hmasa aiin pung a ni.
Larsap leh CB&OCW Advisory Board chairman hi MB&OCWWB chanchin tlangpui, hmalakna bakah hlawhtlinna an chan tawh te leh harsatna an tawhte an hrilh a. Larsap chuan MB&OCWWB hnuaia hnathawktu inziaklut an pung zel te, sum hmuh leh sem chhuah pungte chu lawmawm a tih thu a sawi. LESDE department hotuten a hnena harsatna an thlen chu a ngaihpawimawh thu hrilhin, a tul anga sawrkar laipuia thlenpui a tiam.
Larsap chuan V Srinivasa hi Mizorama inhlawhfate dinhmun sawipuiin, ram leilungfa ten hna tam zawk an thawh a duhsak tih a sawi a. Inhlawhfate hamthatna tura LESDE department hotute inpekna fakawm a tih thu leh MB&OCWWB hnuaia scheme hrang hrang kalpui mek chu tha a tih thu a sawi. Hetih rual hian inhlawhfa thin ten hamthatna tam zawk an neih theihna’n insurance scheme dang – Pradhan Mantri Jeevan Jyoti Bima Yojana (PMJJBY) leh Pradhan Mantri Suraksha Bima Yojana (PMSBY) ah te inziaklut se a duhsak tih a sawi a ni.