Kuthnathawktute hnenah alu chi pe

Kuthnathawktute hnenah alu chi pe
KVK Kolasib chuan kuthnathawktu thlan bikte hnenah Thawhlehni khan alu chi an sem a. Heng alu hi Indian Council of Agricultural Research, Central Potato Research Institute, Shillong Meghalaya atanga hmuh a ni.
Alu hi variety thum – Kufri Pukraj, Kufri Chandramukhi, Kufri Thar sem chhuah a ni a. Khaw pasarih – Phaisen, Bilkhawthlir, Buhchangphai, Thingdawl, Kawnpui Serlui Zau leh Lungdai atangin mi 20 theuh thlan an ni. Heng mi 20 hnenah hian alu chi quintal 10 leh natna laka veng theitu tur damdawi chi thum pek nghal an ni.
KVK Kolasib hian Kolasib district-ah alu chin leh enkawl dan hi hun rei tawh tak atang khan an lo buaipui tawh a, kuthnathawktuten an chhawr tangkai hle tih sawi a ni.
Subject matter specialist (Soil Science) Dr Carolyn Zothansiami chuan alu chin dan leh enkawl dan a zirtir a. SMS (Agriculture Engineer) R Lalchhandami’n tunlai thiamna hmanga lei tel lo, tui chauh (hydroponic) a thlai chin dan a zirtir bawk.
Alu semchhuah pual hun hman hi College of Horticulture, Pasighat Arunachal Pradesh-a final year zirlaiten an rawn chhim a ni.