Kutze thla lak chhunkhawmnaa hriat tur tul Mizoram Police-in zir

Kutze thla lak chhunkhawmnaa
hriat tur tul Mizoram Police-in zir
Mizoram Police leh Forensic Science Laboratory (FSL) hmalakna in Zirtawpni khan FSL-ah National Crime Record Bureau (NCRB), Delhi atanga mithiam lokalten Mizoram Police-te hnenah National Automated Fingerprint Identification System (NAFIS) hman dan tur an zirtir a. Home secretary H. Lalengmawia a hawng.
Training hi Mizoram district 11 atanga NAFIS khawihtu tur bik te hnenah pek a nih mai bakah Adamus University Kolkata Atanga Forensic Science a internship nei mek te pawh an tel ve phalsak a ni ni bawk.
NAFIS-in a tum ber chu India ram puma pawikhawihtute fingerprint (kutzungtang thla) hmun khata chhunkhawm (database) a ni a. Khawl hmanga pawikhawihtute fingerprint lakna leh dahthatna leh hnu chhuina’na tangkai taka hman zel tura duan a ni. He project hnuaiah hian State NAFIS Center-ah leh district tinah fingerprint lakna tur khawl bun vek a ni. Heng khawl hi internet hmanga thlunzawm a nih avangin district tina pawikhawihtute fingerprint lak apiang hi national database – NCRB Delhi-a vawnthat turin awlsam takin a thawn nghal zel theih tawh a; fingerprint case-te pawh District NAFIS Center atang hian State NAFIS Centre – FSL a exam turin awlsam takin a thawn nghal zung zung theih a ni.
Tunah hian NCRB NAFIS-ah pawikhawihnaa inhnamhnawih mi nuai 80 vel fingerprint vawnthat a ni a. Mizoram pawhin pawikhawihtu fingerprint 6200 chuang a dahlut ve tawh a, hmasawn zel tura chak taka hma lak mek a ni.
NAFIS hi a tangkaina hmuh chhoh zel a ni a, kar kalta pawh khan Delhi-ah tu tih hriat loh ruang chhar a ni a, a fingerprint chu Delhi Police-in NAFIS hmanga endikin, Mizoram lama lo neih sa nen a inmil hlauh a, mitthi chu tu nge a nih tih an hriat theih phah a ni.