Kvitova kutah German Open title

Czech Republic nula Petra Kvitova chuan Pathianni khan German Open WTA 500 final match-ah 6-2, 7-6 (6)-a Croatia player Donna Vekic hnehin Rot-Weiss Tennis Club, Berlin, Germany-ah Wimbledon inbuatsaihna tournament lian trophy a hlawhchhuak.
Wimbledon-a vawihnih champion tawh Kvitova hian grass-ah a khel tha tluang a, London khaw grand slam-ah pawh rinkai zingah a tel ang.
Kum 33 mi Czech hian kumin veka Miami Open title a lakna kawngah Croat Vekic hi a lo hneh tawh a, Germany ramah hneh nawn lehin, a career-a a title 31-na a lawm thei.
Veikhawr player Kvitova hian grass chungah title paruk la tling chiahin, WTA player la inkhel mek zinga phul chunga champion ngun ber niin, Wimbledon hawn tumte tan paltlang ngai zingah a langsar ber pawl a tling lo thei lo.
Season liamta Eastbourne title a lak atang khan grass chunga match 13 a khelhah Kvitova hi vawi 12 chakin, tun hi kum 2019 hnu lama season khat chhunga title pakhat aia tam a sualchhuah leh vawikhatna chiah a ni.
Kvitova leh Vekic hian Zirtawpni khan final match hi khel tan tur an nih laiin khuain a bumro a, Inrinniah pawh an la zo thei lo a, Pathianni khan Steffi Graf stadium-ah an tlingtla fel thei chiah a ni.
Kum 26 mi Vekic hian Australian Open quarter-final thlengin, Monterrey title a hlawhchhuak bawk a, tun season-ah hian ranking lamah hma a sawn nasa a, 69-na atangin world number 23-na a luah tawh.