KVS leh Market sak mek tlawh

Lungleia hmasawnna ruhrel pawimawh sak mek pahnih – Kendriya Vidyalaya School leh Market &trade Centre chu Inrinni khan Commerce & Industries minister Dr R Lalthangliana chuan atlawh.
Kendriya Vidyalaya School (KVS) Lungleiah hian principal in-charge Jitendra Kumar Meena leh MAMCO lamin lo dawngsawngin, hna kal mek dinhmun leh hmachhawp an sawiho. Minister chuan KVS chu India ram pum huap pawha zirna in tha leh hmingthang a ni, tiin, zirlai tam zawk an in ziahluh thuai theihna’n project chu uluk taka thawk tur leh a huna zawhfel a nih theihna’n hma la turin a chah.
Tunah KVS Lungleiah hian class I atang class X thleng awmin zirlai 250 an awm a, zirtirtu regular 14 leh contract 4 bakah non-teaching staff 6 an awm. KVS Lunglei tihchangtlun hna hi sawrkar laipui Ministry of Human Resource Development kaltlangin kum 2018 khan cheng nuai 2385.37 ruahman niin, Mizoram Agriculture Marketing Corporation (MAMCO) chuan hna hi a thawk a, tluang taka hna hi kal mekin tunah hna zaa 90 zawh a ni tawh a, rokhawlhna dang a awm a nih loh chuan kumin August-ah zawh hman beisei a ni.
He project hian school building, staff quarters (Type 2, 3, 5), canteen, guard room bakah developmental work hrang hrang – retaining wall, kawng siam, plumbing, electrification adt. a keng tel a ni. Hnathawh zawh a nih hnu chuan zirlai 1500 vel leng tura beisei a ni.
Lunglei Market &trade Centretur hi North Eastern Council sum, nuai 1403.40 senga sak a ni a. He market-ah hian a vaiin stall 339, lirthei 30 lenna tur parking, 2 wheeler 71 lenna parking, police beat post, market office,toilet 34 bakah kudam, bawlhhlawh dahkhawmna leh adt awm tura ruahman a ni. Contractor hi Lalzothanga Maubawk Aizawl niin, chhawng li-a sak tur, 2024 August 25 a zawh hman tura tih a ni.
Minister hian hna enkawltu PWD hotute chu hna kal mek dinhmun leh hmachhawpte a sawipui a. Market & trade Centre chu Lunglei district tana hmasawnnna ruhrel pawimawh ber zing ami, Lunglei economy tana pawimawh tak la ni zel tur a nih avangin a bultanna atanga uluk leh fimkhur taka hna kalpui a, hmanrua tha tak zel hmangturin PWD engineer-te leh contractor-te a chah a ni.