LA Clippers in Nets an sawp

Ningani zing khan NBA regular season khel chhunzawm a ni a, Los Angeles Clippers chuan NBA-a an club record thar siamin Brooklyn Nets chu point 59 zetin an hneh.
LA Clippers leh Brooklyn Nets te hi set khatnaah an inhnehtawk viau a, quarter hmasa berah point 21 ve ve thawkchhuakin chungnung zawk an awm theih lo. Quarter hmasa berah chungnung zawk awm thei lo khawpin inhnehtawk bawk mah se quarter dang zawngah Clippers hian an khingpuite an sawp zui ta nek thung.
Quarter hnihna atangin Clippers hian an zia an chhuah tak tak tan a, quarter hnihnaah point 23 zetin an chungnung a, point 23 a hmahruai chungin chawlhlawk an hmang. Chawlhlawk hnu lamah an khel tha zui leh viau a, quarter thumnaah point 28 zetin an chungnung zui leh. Quarter hnuhnung ber an hmachhawn dawn meuh chuan point 51 in hma an hruai der tawh. Nets hian quarter hnuhnung berah an inkar tihzim tumin tan khawh viau mah se an hlawh tling zo lova, an khingpuite lakah hian point 8 in an hnufual zui leh ta tho a. Inkhel a tawp meuh chuan Los Angeles Clippers chuan an khingpui Brooklyn Nets chu point 126-67 zetin an sawp ta a ni.
NBA-ah point 59 zeta an chak hi LA Clippers chak chian ber tum a ni a, kum 2022 khan an khingpui Oklahoma City Thunder chu point 50 in an lo hneh tawh a, an club record chu ningani zing khan khumin a awm. Point 59 zeta Clippers chak hi NBA-a inhnehna sang zual 10-na a ni thung. Brooklyn Nets lakah hian point 67 zeta san fal chang nei bawk mah se Clippers coach Tyronn Lue chuan quarter thumna tawp dawn hnaih atangin player a thlakkual tan a, a player zawng zawng a khel kim tir vek. Heti chung hian point 59 in an chak thei ta tho a ni. Point 59-a an chak hi an chak chian ber tum a nih laiin an tlawm chian ber tum chu kum 1978-ah point 52 zeta Houston Rockets an hneh lo kha a ni ve thung.
Brooklyn Nets an sawp tum hian Kawhi Leonard chuan point 23 a thawkchhuak a, James Harden chuan point 21 a thawkchhuak ve thung. Player che tha fal hluai awm lem lo mah se an chetha rual em em thung.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More