EPL – Arsenal in Liverpool an hnaih

January 15, Nilai zan khan English Premier League (EPL) 2024-25 khelh chhunzawm a ni a. Inkhel ngaihven hlawh tak; London derby-ah Arsenal in an mikhual Tottenham an lehthal a, hmahruaitu Liverpool an hnaih leh zual. Nilai zana inkhel dangah Newcastle United in hnehna an chang a, champion cho ngam an nihzia an lantir chiang deuh deuh zel.
Arsenal 2-1 Tottenham
FA Cup-ah Manchester United an hneh loh vangin Arsenal in sawisel an hlawh a, an boruak pawh a hniam viau. An boruak hniam lai takin North London derby an hmachhawn a ngai a, inkhel pawimawh zet an hmachhawn zui a ngai. An elpui kumhlun Tottenham hmachhawn an nih vangin chak an mamawhzia an hrechiang a. Rinhlelhna tuipui fawn karah huaisen takin an inlan a, goal chhuah hmasa mah se hnehna changtu zawk an ni a, point thum hlu tak an hmu.
Emirates Stadium a lenglut Tottenham in bul an tan tha a, minute 25-naah captain Son Heung-Min chuan hmahruaina goal a thun. An elpui lian lakah goal an thun hmasak vangin Spurs an phur a, inrintawkna sang zawk nen an inlan zui thei bawk. Mualneitu Arsenal in an si phurh sut ngei tumin tan khawh bawk mah se an kut zalah goal an thun thei mai lo. An hun tha hloh zel mah se Gunners hi chawlhlawk hmain an vannei hlauh a, own-goal hmangin an si phurh an sut. Minute 10-naah Spurs forward Dominic Solanke chuan an lamah a ti-goal palh hlauh a, an hmelma Arsenal si phurh a sutsak.
An si phurh an sut hnuin Arsenal an khel tha zui viau a, goal an thun zui leh thuai. An si phurh sutna goal an thun atanga minute lina lekah Leandro Trossard chuan Martin Ødegaard siamsak atangin hma an hruai letna goal a thun a, 2-1 a hmahruai chungin chawlhlawk an hmang.
Chawlhlawk hnu lamah goal thun tumin London hmar veng club lian pahnih an innawr tawn nasa viau naa goal thun thei an awm tawh lo. Arsenal chuan an mualah 2-1 in hnehna an chang a, point thum hlu tak an hmu. An mualah an chak vangin Arsenal hian an chunga awm Nottingham Forrest an lehpel a, pahnihnaah an inhlangkai. Gunners hian khelh 21 atangin point 43 an hmu a, hmahruaitu Liverpool nen an inkarah point li chiah a tla zep tawh a. Reds ai hian vawi khatin an kel tam zawk hret thung. Arsenal in hma an sawn laiin Tottenham erawh chuan 13-na an luah ve thung.
Newcastle an chak
Nilai zana inkhel dangah Newcastle United chuan an mikhual Wolves chu 3-0 in an sawp a, top four huang an luah. An mualah an chak leh tak vangin Newcastle hian champion cho ngam an nihzia chiang zawkin an lantir.
Newcastle hian an mualah an khel tha viau a, forward ngaihven hlawh Alexander Isak chuan minute 34-naah hmahruaina goal a thun. Chawlhlawk hmain goal thun belh thei lo mah se chawlhlawk hnu lamah goal an thun belh leh thuai a, hmahruaina goal thuntu Isak chuan minute 57-naah an goal hnihna a thun a. Anthony Gordon chuan minute 74-naah an goal thumna a thun zui leh bawk Magpies hian khelh 21 atanga point 38 hmuin palina an luah.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More