Real Madrid leh England midfielder Jude Bellingham hu La Liga 2023-24 season-ah player tha berah thlan a ni. Bellingham hian La Liga-a a season hmasa berah chawimawina ngaihhlut hlawh La Liga player of the Year chawimawina a dawng nghal.
Khawvela football club hausa leh hlawhtling ber Real Madrid chuan England midfielder Jude Bellingham hi German club Borussia Dortmund atangin an la lut a, a manah hian 103m euros (£88.5m) zet an seng. A mah sum hlawm lian thehchhuak mahse Los Blancos hian an tisual lo viau a, La Liga-ah a champion bakah Champions League final a hruai thleng bawk.
Bellingham hian a club Real Madrid tan La Liga-ah goal 19 a thun a, point 10 ngawta falin Real Madrid hi an champion. Champions League final-ah Borussia Dortmund an hmachhawn zui leh dawn a, champion tura rinkai zawk an ni. La Liga-ah a chet that em vangin La Liga player of the Year-ah thlan a ni tawh a. Champions League-ah an champion a, Euro 2024-ah a chetha a ni bawk chuan Bellingham hian football a chawimawina ngaihhlut hlawh ber Ballon d’Or a dawn a rinawm zui viau ang.
La Liga player of the Year chawimawina dawng turin Bellingham hian Real Madrid tana a khelhpui Vinicius Jr bakah Antoine Griezmann (Atletico Madrid), Artem Dovbyk (Girona) leh Robert Lewandowski (Barcelona) te a khum. He chawimawina dwng tur hi fans, club captain leh panel of expert ten vote hmanga an thlan a ni. Kum 20 mi Bellingham hian 2022-23 khan Bundesliga Player of the Season-ah thlan a lo ni tawh bawk. Euro 2024-ah England player pawimawh niin, player ngaihven hlawh zinga mi a ni ang. England tan hian vawi 29 khelin, goal thum a thun tawh.
La Liga player tha ber Bellingham
Get real time updates directly on you device, subscribe now.
Prev Post