LA RAM KANG: Thli a thaw thar leh, buaina a lian zel

LA RAM KANG: Thli a thaw thar leh, buaina a lian zel
California-a khawchin hrilh lawktute chuan thli chak tak a la tleh chhunzawm dawn niin an sawi lawk a, hei hian Los Angeles chhehvela ram kang chu tun kar chhungin a kan kai chak lehzual a tirinawm hle a. Hetih lai hian a thelhtute pawhin theihtawp an chhuah mek zel bawk.
Thuneitute chuan kartawp velah khan thli hi a ziaawm hret a; mahse, Pathianni zan atang khan Santa Ana thli ro tak chu Nilaini vel thleng hian a chak leh dawn tih an sawi lawk a, darkar khata km 96 lai pawh a tling dawn niin an sawi.
Thli thaw a nep deuh chhung hian khawpui lehlam ve vea kang, Palisades leh Eaton fire-te chu eng emaw zat tihmih hman a ni a. Tual chhung kang thelhtute chu state dang pariat bakah Canada leh Mexico-a miten an pui tawh a, an thlen belh mek zel bawk.
LA County medical examiner chuan kangmeia thi hi Pathianni khan 24 an tling ta tih an sawi a, thuneitute chuan hemi hma hian mi 16 vel chin hriat lohvin an awm tih an puang bawk.
Thi zinga 16 hi Eaton fire zone-a mi niin pariat chu Palisades-ah a ni.
Los Angeles khawpui chhehvelah hian lian tak takin hmun thumah a la kang zel a. Palisades chu a nasa ber niin acre 23,000-a zau a kang tawh a, 13% chauh la thelh theih a ni.
Eaton fire chu a nasa ber dawt niin ram acre 14,000 chuang a kang tawh a, 27% thelh tawh a ni a. Hurst fire chu acre 799 kang tawhin thelh mih deuh vek a ni tawh thung.
Tun tuma ram kang hi US chanchina a man a san ber tum a ni tawh a. Pathianni khan private forecaster Accuweather chuan thil kang chhe hlut zawng hi chhut thuakin $ tluklehdingawn 250-275 inkar niin an sawi.
Kang thelhtuten a lian ber hi nasa taka an beih mek laiin thuneitute chuan thli thawk thar leh mek chuan ‘hlauhawm zawk’ a thlen thei niin an sawi a, LA County pum a kan mai hlauhthawnna an nei.
“Vanduaithlak takin tunah hian red flag lam hawiin kan kir leh a, thli na tak hi tun atanga Nilaini thleng a thawk leh dawn a, Thawhlehni hi a nat vanglai ber tur a ni,” tiin Pasadena fire chief Chad Augustin chuan BBC a hrilh.
“Hma chu sawn ve hret hret zel mah ila a tawp chu kan la hlat rih,” a ti.
National Weather Service chuan an tihchhuah khat tak, hlauhawm dinhmun inralrinna chu Thawhlehni atang an tichhuak a, ‘extreme fire behaviour’ hi an ram huna Thawhlehni zing dar 04:00 atanga Nilaini chhun lai thleng atan an tichhuak a ni.
LA fire chief Kristin Crowley chuan inthiar chhuak tura tihte awmna bul hnaia mite chu inthiar chhuak tura tih an nih ruala che nghal thei tura inring turin a ti a, kawngpuite pawh kang thelhtute chet vel tibuai lo tura zuah turin a ti bawk.
Khaw chun thlirlawkna duhawm lo hle mah se Thawhtanni khan inthiar chhuak tura tihna hmun tih lohte chu sikul hawn leh tan a ni tih LA Unified School District chuan a puang.
Ram kang mekah hian inthiar chhuak tura tihna hmuna mi rawk thubuaiah mi 29 vel an ni tawh bawk a. Mi pahnih chu kang thelhtute nena an intihbuai avangin man an ni bawk.
Los Angeles County Sheriff Robert Luna chuan Pathiannia thuthar lakhawmtute a kawmnaah National Guard sipai 400 dah mek bak dah belh tura dil a ni tih a sawi a. California Governor Gavin Newsom pawhin 1,000 tirh belh turin a ti bawk.
Tunah hian Califirnia chhim lamah hian kang thelhtu 14,000 an awm mek a, thlawhna 84 leh fire engine 1,354 an inchhawp bawk tih Sheriff Luna chuan a sawi.
Inthiar chhuak zat erawh a tlahniam hret a, mi 1,05,000 vel inthiar chhuak tura tih niin mi 87,000 vel inring tura tih an ni bawk.
Thuneitute chuan kangmei awmna lai velah drone khalh lo turin a ti nawn leh a, heng drone hian thlawhna a su buai thin tih hriat a ni.
FBI pawhin Ningani khan drone te chi leh thlawhna, ‘Super Scooper’ an tih, kang thelh thlawhna thawh hlawk tak insu lai thlalak an tichhuak a, thlawhna hi rei vak lo dintir a ngaih phah.
Politics lamah pawh California Governor Newsom leh president thar tur, Donald Trump-a inpuh tawnna pawh a la kal chhunzawm zel.
January 20-a lak luh tur, Trump-a hi governor hian kangmeiin chhiatna a thlenna hmunte tlawhpuiah a sawi a, ‘ramin chhiatna vawrtawp a tawh laia ral atanga indem mai lo turin’ a ti.