LA ram kangah mi 10 thi, tihchiat tam

Tual chhung thuneitute chuan Los Angeles huam chhung hmun hniha ram kang avangin mi 10 vel an thi tawh a, chenna in leh thil dang ding 10,000 vel a kang chhe tawh niin an sawi a. Hmun khat danga kang avangin mi sang tel insuan chhuak turin an ti bawk tih an sawi.
Kangmei chhuak thar ber, Kenneth fire an tih hi Ningani chawhnua San Fernando Valley bulhnai, West Hills-a chhuak a ni a. Kang thelhtute chuan Palisades leh Eaton fire thunun tumin an la bei mek bawk.
“Thla a thawt nat em avangin rang taka a inman kai kan ring,” tiin Los Angeles Mayor Karen Bass chuan a sawi.
County of Los Angeles Department of Medical Examiner chuan Ningani zan dar 9:00 (India-a Zirtawpni tuk) thleng khan mi 10 vel an thi tawh niin a sawi a, hemi ni chawhma lamah chuan mi pasarih an ni.
Palisades leh Eaton fire-ten thil ding 5,000 chuang a kan chhiat hnuah inthiar chhuak tura tihna thar tihchhuah leh tawh a ni a, thil kang chhe zingah hian chenna in bakah car leh shed te pawh a tel.
Hmun hniha ram kang hian ram acre 30,000 chuang a kang tawh niin state wildfire agency Cal Fire chuan a sawi.
Los Angeles County Sheriff Robert Luna chuan mi pasarih thi an awm tawh tih an hriat laia thuthar lakhawmtute a kawmnaah an pun ngei a rinawm thu a lo sawi tawh.
“Heng lai hmunah hian atomic bomb thlak ang mai a ni a, chanchin lawmawm lam kan beisei ngam lo va, thi zat hi a pun a rinawm hle a ni,” tiin Luna hian a sawi a ni.
Los Angeles County Sheriff’s Department chuan mi 1,80,000 dawn inthiar chhuak tura thu pek an ni tawh tih an sawi a, mi 2,00,000 chuang hnenah inthiar chhuak tura inring tura hriattirna an pe tawh bawk.
Ram puma power dinhmun tar langtu, PowerOutage.us chuan Southern California-ah hian mi cheng 2,85,000 chuangin electricity an nei lo tawh niin a tar lang a. Hetih lai hian tui lakna leh thli sawngbawlna hmunte pawh a chhe nasa hle bawk.
Thawhlehnia kangmei a chhuah atang khan darkar khata km 112-a chak thli tleh rengin Malibu leh Pacific Palisades velah meivap thahnem tak a len lut tawh bawk.
National Weather Service chuan Ningani thimhlim atangin thlir hi chak leh hretin a tukah chuan a ziaawm dawn niin a sawi lawk.
Mi lar tam tak zingah James Woods, Paris Hilton leh Billy Crystal te pawhin ram kang avang hian an chenna in an chân hlawm.
Malibu Pacific Palisades Chamber of Commerce hotu, Barbara Bruderlin-i chuan, “Heng lai hmuna thil awm chu a bo ta vek a, thing tang pakhat pawh a bâng lo va, vut chiah a awm tawh,” a ti.
Thuneitute chuan ram a kan chhan hi puh an la nei chiah lo va, a chhan ni thei hrang hrang chhui erawh an chhui mek.
US-a ram a kan chhan tam ber hi tek tla a ni thin a; mahse, National Fire Protection Association chuan tun tuma ram a kan tan lai vel hian tek tla engmah a awm lo niin a sawi ve thung.
A chhan dang lian leh chu mei hal vang leh power line atangin a ni.
California Governor Gavin Newsom chuan an state National Guard chu ngenna an nihna hmunah tirh chhuah an ni a, LA County Sheriff’s Department pawhin dan leh thupek kenkawh leh inrawkna a thlen lohna turin an pui bawk tih a sawi.
“Kan neih ang zawng zawng kan theh chhuak a, kan National Guard service member-te ngei pawh vantlang himna turin kan tir chhuak a ni,” a ti.
“Mi inthiar chhuah lai remchang zawnga pawi lo khawih an awm kan duh lo va, mi thil ruk phei chu ngaihdam an ni lo vang,” a ti bawk.
January 20-a Donald Trump-a’n a thlak mai tawh tur, US President Joe Biden pawhin sorkar laipuiin ni 180 lo awm leh tur chhungin California din chhuah lehna tura mamawh ang zawng zawng a pek chhuah tur thu a sawi.
White House-a senior adviser-te nen an thutkhawm hnuah, “Governor, tual chhung thuneitute hnenah an mamawh leh kangmei tihmih a nih theihna tur chuan engmah lo lungngai lo turin ka hrilh,” a ti.
Biden-a hian amah thlaktu tur, Newsom-a leh Bass-a ten chhiatna an hmachhawn dan nasa taka sawisel tawh thin, Trump-a sorkar a lo din hunah pawh an mamawh ang chu a ngaihtuahsak ngei a beisei thu a sawi bawk.