Putin-a nena inbe turin ruahmanna siam

Donald Trump-a chuan Russian President Vladimir Putin-a nena inkawm turin ruahmanna siam a ni tih a sawi.
US president thar tur hian engtik hunah nge an inkawm dawn tih erawh a sawi chiang lo thung.
“Inkawm a duh a, chumi ang chuan ruahmanna siam a ni,” tiin Florida-a a chenna hmun, Mar-a-Lago resort-ah a sawi.
Russian news agency Tass erawh chuan Kremlin thupuangtu, Dmitry Peskov-a sawi tar langin US hian dan pangngai ang taka inkawm tura ngenna an la siam loh thu a tar lang thung.
Trump-a hian a hmain January 20-a president thutthleng a luah leh atangin Ukraine-a indona kal mek tihtawp a lo tiam tawh a, US-in sipai leh suma Kyiv a puih dan pawh a lo sawihnawm tawh.
“President Putin-a hian min hmuh a duh a ni,” tiin Ningani khan a sawi.
“Vantlang hriatah pawh hei hi a tilang a, kan pahnih hian indo hi tawp se kan duh a ni,” a ti bawk.
Trump-a hian a sorkar vawi hnihna turah hian Ukraine leh Russia-a special envoy (palai) turin national security adviser hlui, US sipaia lieutenant-general hlui ni tawh bawk, Keith Kellogg a ruat.
Kellogg-a hian nikum April thla daih tawhah khan Trump-a thlawptu think thank pakhat, America First Policy Institute-in zirchianna a tihchhuahah US-in indo a tihtawp theih dan a lo ziak tawh a ni.
He research paper-ah hian Ukraine hian US puihna tam zawk a dawn chauhvin Moscow nena inremna tura inbiaknaah a tel duh dawn niin a tar lang.
Paper-ah hian Moscow hian inbiakna kalpui a duh lo a nih chuan US hian nasa zawkin Ukraine a puih mai a ngai dawn niin a tar lang bawk.
November thla inthlana Trump-a’n hnehna a chan hnu lawkah khan Ukrainian President Volodymyr Zelensky-a pawhin Trump-a a president chuan indona chu a hma zawng aiin ‘a tawp hnaih’ a rin thu a lo sawi ve tawh bawk.
Zelensky-a hian an pahnihin tha taka phone-a an inbiak thu a sawi bawk a, Trump-a hian Russia nen inbe turin a nawr leh nawr loh erawh a sawi lo thung.