LAD directorate hmun thar hawng

Cheng nuai 600 senga sak Local Administration Department (LAD) directorate building thar, Mizoram New Capital Complex (MINECO) ami chu Thawhlehni khan LAD minister K Lalrinliana’n a hawng.
Office building thar chuan ram leh mipui rawngbawl sak kawngah tih takzetna, Pathian hrereng chunga thawk tura inpekna thar siam se a duh tih minister hian a sawi a. DLAO Aizawl office pawh directorate kiangah SASCI sum hmanga sak a nih theih nan hma lak a nih thu leh Directorate Conference Hall changtlung tak vertical extension hmanga siam tura ruahman a nih thu a sawi.
Village council-te enkawl leh zirtirna pek kawngah, tualchhung inrelbawlna leh hmasawnna ruhrel siam bakah VC area-a chengten eizawnna ngelnghet an neih theih nan LAD-in Rashtriya Gram Swaraj Abhiyan leh hmalak theihna ang angte kaltlangin hna a thawh thin thu K Lalrinliana hian a sawi a. Tun dinhmunah VC 243-te computer pek an nih tawh thu te, Thenzawlah Handloom Design Training cum Production Centre hawn mai theiha siam a nih thu te, Tuipui Darzokaiah Rural Homestay & Agro Tourism siam a nih thu te, Kolasib district-ah kuhva kawr atanga plate siamna din a nih thu te a sawi. VC House leh Common Service Centre tam zawk sak tum a nih thu leh LAD Park engemawzat enkawltu dang kuta hlan a nih thu te, Leng khuaah Solar Harvesting Project leh Bairabi-ah Truck Terminal leh Chawlhna Tui Kam siam tura hmachhawp neih a nih thu a sawi bawk.
LAD Directorate building thar hi 2019 December 15 atanga sak tan niin kumin July-a luahluh a ni. A sak hna hi Zothan Consultancy Services Luangmual Aizawl-in a thawk a. Zopa chhiara chhawng 5 a ni.