LADC-a sorkar tur a la chiang lo: ZPM-in MNF leh Congress thawhpui loh rel

Lai Autonomous District Council (LADC) inthlan a zo a, engkim tihfel hnuah sorkar tur a la chiang lo. Thawhlehni-ah vote an chhiar a, a tukah pawh sorkar tur a la chiang lo.
Sorkar siam tuma party hrang hrang an indawr kual laiin ZPM chuan MNF leh Congress thawhpui loh an rel.
December ni 10-ah khan Aizawlah ZPM PAC (Political Affairs Committee) an thu a, LADC-ah MNF leh Congress thawhpui loh hi an rel. Thu dawn danin, LADC inthlan vote chhiar hma khan PAC hian MNF leh Congress thawhpui loh hi an lo rel tawh a, mahse an puangzar lo. Nilainia an thutkhawmin an thu lo dah tawh chu an pawm nawn leh a ni.
ZPM PAC thutkhawmah hian an party president a tel lo a, ani hi Lawngtlai vote chhiar ni-a awm turin a phei.
Lawngtlai lamah chuan ZPM hi Congress party nen an indawr a, CEM-ah C Ngunlianchunga, chairman atan T Zakunga tia rawtna pawh a awm a, hei hi Nilaini-a mi a ni. Amaherawhchu, Aizawl lamah Congress leh MNF thawhpui loh an rel avangin, an indawrna hi tawp mai turah ngaih a ni.
Party mala sorkar thei an awm lo a, MNF leh ZPM an thawkho lo tura ngaih ngheh a nih avangin Congress hawi lam lam an sorkar ang tih chu thlir dan ber a ni.
Thu dawn danin, vote chhiar zanah khan MNF leh Congress an inbia a, thu mum erawh an nei lo. MNF lam hian a tling tam ber an nih avangin CEM chang turah an inngai a, chutih rualin sorkar a din theih loh ngawt ai chuan tiin Congress-in CEM chang se tih ngaihdan pawh an nei. C Ngunlianchunga hi a mimalin an pawm viau tho nia hriat a ni. Mahse Congress leh ZPM nen an inbiak leh tak avangin MNF lam pawhin an ngaichang ve ta ringawt tih thu dawn a ni.
LADC-ah hian BJP-in MDC pahnih an nei a, independent candidate pahnih an tling bawk. Mahse, an pali hian MNF emaw Congress emaw ZPM emaw hian chang pawh ni se sorkarna siam thei khawp an tling chuang lo. Chuvangin MNF, Congress leh ZPM te zingah tang dun an awm a ngai a ni.