LADC-ah sorkar la piang lo

Lai Autonomous District Council (LADC) inthlan hnu feah pawh sorkar a la piang lo a, sorkar pian loh chhan hi chiang taka hriat a ni lo.LADC-ah hian 2025 December ni 3-ah vote an thlak a, ni 9-ah vote hi chhiar a ni. MNF leh ZPM-in sorkar intawm an siam theih thu an sawi hnuah pawh sorkar hi a la piang lo.
Lawngtlai atanga thu dawn danin, MNF leh ZPM-in sorkar an intawm an siam theih thu hi larsap hnenah vawi hnih an thlen tawh a, chuti chung pawh chuan sorkar din tura tih an la ni lo.
Party pahnihte hian Lairam Legislature Party an din a, kum liam ta December ni 14-ah khan party pahnih atanga MDC te’n hming an ziak a ni.
Thu dawn danin, a tukah leader atana an thlan T Zakunga’n sorkar a siam theih thu hi larsap hnenah a thlen nghal a, mahse larsap hi a zin nia sawi niin, ni 18-ah file a en chauh ang tih chhanna an hmu a, chumi hnuah protem chairman ruat tura tihna a chhuah a, sorkar siam theih thu ziahna hi a hmu lo nia sawi a nih avangin T Zakunga hian sorkar a siam theih thu hi a thlen nawn leh a ni.
Larsap hian sitting hmasa ber neih hun atan kum liam ta December ni 31 kha a ruat a, harsatna neuh neuh a awm avangin January ni 5 a ti leh a, chumi hnuah ni 7 a ti leh. Sitting hmasa ber hi protem chairman-in a kaihruai ang a, chairman tur an thlang ang. Chutianga ti tur chuan sorkar a awm si lo a, CEM pawh an nei si lo a, chutiang an ni chunga sitting hmasa ber nei tura tih chu LADC-a thlan tharte hian mak an ti tih thu dawn a ni.