LADC-ah sorkar tur a chiang lo telh telh

On Jan 7, 2026 8 0

Kum hlui December thla chawhma lamah inthlan an zo fel tawh a, tun thlengin sorkar thar a la piang lo. Lai Autonomous District Council (LADC) sorkar thar tur a chiang lo telh telh a, sorkar in\awm siam tumtu party pahnih MNF leh ZPM te an keh leh tawh.Thawhlehni khan MNF-in LADC-a ZPM an thawhpuina hi an titawp a, hei hi ziakin ZPM an hriattir. He thil hi Aizawla MNF hruaitute rorel a ni.
MNF leh ZPM hian Lairam Legislature Party dinin sorkar an siam theih thu hi larsap an hriattir tawh a, mahse hetia MNF-in an thawh dunna an tihtawp takah chuan party hrang hrang an indawr that leh a ngai turah ngaih a ni.
Larsap-in Nilaini-a thu turin thutkhawm hmasak ber a ko a, hei hi rorel kaihruaitu tur chairman thlan hun tur a ni. Chairman atan hian MNF, ZPM leh BJP tanghovin Sangliana Mualchin an dah a, Congress party-in H Laltanpuia an dah. Tlai dar 3 thleng nomination file theih a ni a, anni pahnihin nomination an file hnuah MNF-in thu dang an nei ta a ni.
MNF leh ZPM-in leader atana an thlan T Zakunga (ZPM) chuan an kal zel dan tur sawi lawk theih a nih loh thu a sawi a, “A buaithlak khawp mai. MNF nena sorkarna siam mai tura kan inngaih laiin an hotute’n thu dang an rawn nei leh ta si a. Kan kal zel dan tur hi sawi lawk theih pawh a ni lo,” tiin The Aizawl Post a hrilh.
“Sorkar a pian a ngai si a, indawr that leh te pawh a ngai ang a. Keini hi chu kan ngawi mai dawn nge ni, kan hrethiam bik lo,” a ti bawk.
LADC-ah hian kum liam ta December ni 3 khan vote an thlak a, December ni 9-ah vote hi chhiar niin, MNF-in seat 8 an la a, Congress-in 7, ZPM-in 6, BJP-in 2 an la a, independent ticket-a ding pahnih an tling bawk. Party mala sorkarna siam thei an awm lo a, vawiin thlengin sorkar tur a chiang thei lo.
Result puan hlimah Congress leh ZPM an indawr a, sorkar mai tura rin an nih laiin ZPM leh MNF an indawr ve leh. ZPM leh MNF hian sorkar intawm siam an tum ta a, CEM tur an tihfel bakah chanvo dang pawh an insem fel. Larsap hnenah sorkar an siam theih thu an thlen a, mahse larsap-in sorkarna siam tura ti lovin, thutkhawm (sitting) erawh a ko. Kum hlui December ni 31 atan a ko a, chumi hnuah January ni 5 atan, chumi hnuah January ni 7 atan a ko leh.
Nilaini hi sitting hmasa ber neih hun tur chu a ni a, an thukhawm dawn em tih pawh hriat a ni rih lo.