Lady Gaga & Bruno Mars ‘Die With a Smile’ a Hot ber

Lady Gaga & Bruno Mars ‘Die With a Smile’ a Hot ber
Lady Gaga leh Bruno Mars hla hit ‘Die With a Smile’ chu Billboard Hot 100 (singles) chart-ah a No.1 ve ta hlawl mai a, Gaga tan he chart-a a hla No.1 kai thei parukna niin, Mars tan a pakuana a ni ve thung.
‘Die With a Smile’ hi nikum August thla chawhnu lam khan chart No.3-ah a debut a, chumi hnuah November thla khan he chart No.2-ah hian kar li a awm hman a, No.1 erawh a kai thei tlat lo. Tichuan, an tlangzarh atanga kar 20 hnuah chart No.1 a kai ta chauh a ni.
Gaga chuan kum bul tan nana ‘Die With a Smile’ Hot 100 chart No.1 an ni thei chu lawmawm a tih thu sawiin, TikTok-ah video a post a, “Ka thian Bruno Mars nena kan hla ‘Die With a Smile’ Hot 100 No.1 a kai thei hi ka lawm tak zet a ni.
Gaga hian a studio album pasarihna pawh a tichhuak dawn hnai tawh a, he album-a hian ‘Die With a Smile’ hla pawh hi a dah tel dawn a, album-a tel tur hla dang ‘Disease’ pawh nikum October khan a tichhuak tawh bawk. Gaga album thar hi February thlaah a tichhuak ang.
Billboard Hot 100 (singles) chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
‘Die With a Smile’ hian radio airplay maktaduai 59.7 leh stream maktaduai 27.1 bakah selas 6000 nei lehin, an tlangzarh atanga thla nga hnuah chart No.25 atangin No.1 a kai ta a ni.
Chart No.1 hlui, he chart-a kar 19 chhung No.1 nia, chart No.1 ni rei thei ber record nihrualtu Shaboozey ‘A Bar Song(Tipsy)’ chu No.24 atangin No.2 a kai thar leh ta a, Billie Eilish ‘Birds of a Feather’ chu No.28 atangin No.3 a kai thar ve leh ta a, chart No.1 pawh lo ni tawh Teddy Swims ‘Lose Control’ pawh No.4 a kai thar ve leh ta bawk.
ROSE leh Bruno Mars ‘APT.’ pawh No.34 atangin No.5 a rawn kai thar ve leh ta a. He hla hi nikum November khan chart No.8-ah a debut a, BLACKPINK member ROSE tan solo artist anga Hot 100 chart-a Top 10 a kai vawi khatna a ni a, K-pop hmeichhe artist zinga solo artist anga Hot 100 chart top 10-a lang thei hmasa ber a ni bawk.
Gracie Abrams ‘That’s So True’ chu No.33 atangin No.6-ah a kai thar leh a, chart No.3 pawh lo ni tawh Kendrick Lamar leh SZA ‘Luther’ chu No.27 atangin No.7 a kai thar leh a, chart No.1 hlui Post Malone ‘I Had Some Help’ featuring Morgan Wallen chu No.47 atangin No.8 a kai thar leh a, chart No.3 pawh lo ni tawh Sabrina Carpenter ‘Espresso’ pawh No.46 atangin No.9 a kai thar leh a, chart No.2 pawh lo ni tawh Sabrina Carpenter ‘Taste’ chu No.41 atangin No.10 a kai thar ve leh ta bawk.