Lady Gaga concert chhimtu maktaduai 2.5 an tling!

Lady Gaga concert chhimtu maktaduai 2.5 an tling!
An rama May ni 3 khan Copacabana Beach, Rio de Janeiro, Brazil-ah Lady Gaga-i’n free concert a nei a, he concert-ah hian mipui maktaduai 2.5 pungkhawm angin an chhut a, hmeichhe zaithiam concert-a mipui punkhawm tam ber a la ni a, Gaga pawhin, “Zanin hian history kan siam a ni. History min siam pui avangin ka lawm e,” a ti.
He concert hi an ram sana-a zan dar 10-ah tanin, Gaga hian 2011-a a hla ‘Bloody Mary’-a bul tanin, fan favorite ‘Poker Face’ leh ‘Alejandro’ te tichho zelin, a album thar ber ‘MAYHEM’ hla te pawh a hrut tel ta zel a ni.
Gaga concert chhim hian Copacabana Beach-ah hian mipui maktaduai 2.5 an pungkhawm niin an chhut a, hei hi hmeichhe zaithiam concert-a mipui pungkhawm tam ber a la ni a, a hmaa hetiang record chu Madonna-i’n 2024-a Copacabana Beach-a a siam tho niin, Madonna concert-ah hian mipui maktaduai 1.6 an pungkhawm ve thung.
Concert chhimtu mipui tam berna ni a Guinness World Records-in a chhinchhiah chu 1994-a Copacabana Beach-a Rod Stewart-a New Year’s Eve concert niin, hemi tum hian mipui maktaduai 3.5 an pungkhawm niin an tarlang a, he record hi kum 30 chhung chu khumtu awm loin a ding tawh a ni.
Gaga concert chhim tur hian Brazil ram pawn atangin mi 5,00,000 chuangin Brazil an pan niin tourisam department lamin an tarlang a, Copacabana Beach-ah hian free concert hi la buatsaih chhunzawm fo an tum thu an puang bawk.
Tun tum Rio-a Gaga concert hi 2012 hnua Brazil-a a concert lehna hmasa ber a ni a, 2017 khan Rock in Rio-a perform tur a ni a, mahse, taksa lam hrisel lohna avangin a inlan thei ta lo a ni.