Laizawn pathum kum belhkhawmin record siam

Unau pathum kan awm nual awm e, unau pathum la dam kim vek te kum kha han belhkhawm ula, kum engzat nge in tlin theih? Brazilian laizawn pathum- Zulina de Dues Nunes, Zoraide de Deus Mota leh Levita de Deus Nunes te kum belhkhawm chu kum 316 leh ni 302 niin, Guinness World Records an siam.
Levita hi a upa ber niin, kum 109 a ni tawh a, an milai Zoraide chu kum 104 niin, a naupang ber Zulina pawh kum 103 a tling tawh. Levita hi June ni 7, 1917 a piang a ni a, unau pariat zinga a upa ber dawttu a ni. In chhung enkawltu, a unaute enkawltu berah tangin, pasal pawh a nei ta lo a, fa pawh a nei lo, a chhungte tan a inpe a ni deuh ber mai.
Zoraide hi November ni 24, 1921 a piang niin, primary school zirtirtu-ah te a tang lawp lawp a, chumi hnuah nurse a ni leh ta, damdawi in hrang hranga a thawhkual hnuah a chawlhsan ve tawh. 1950-ah Eneas Alves da Mota nen innei, fa panga a nei.
Zulina hi March ni 4, 1923 a piang a ni a, July ni 17, 1945-ah Jose Benvindo dos Santos nen inneiin, fa paruk an nei a, a pasal nen an inthen hnuah Rio de Janeiro-ah a pem a, tunah chuan an pathum hian Rio de Janeiro-ah hian an awm vek tawh a ni.
An unau thum kum belhkhawm hi Guinness World Records chuan laizawn pathum damlai kum belhkhawm tam berah a puang a ni.