Tun hnai ruah surah lak (pump) tlak loh khawpin Tlawng lui a nu a, Aizawl mipuite hnena tui semtu PHE department pawhin pump lovin a fim hun an nghak tawp! PHE department atanga thu dawn danin, May ni 2, Zirtawpnia ruah surah khan Tlawng lui hi a nu a; zanlaiah a nu telh telh a, zing lam dar 1 vel atangin pump chi loh khawpin a nu. Hei vang hian a tuk Inrinni-ah pawh tui an pump thei lo.
Tui hi a nut dan tehna NTU (Nephelometric Turbidity unit) 5 leh a hnuai lam a nihin mipui hnena sem tlakah ngaih a ni a, kar hmasa Zirtawpni zan leh Inrinni zing lamah khan Tlawng lui hi NTU 984 te a ni a, Inrinni tlai dar 3 velah khan NTU 800 velah a tla, PHE department hotute chuan an ti.
An sawi danin, NTU 300 te, NTU 400 te pawh ni se bawlhlo hmangin an tifim thin a, an pump sa tifimin NTU 5 chin a nihin an sem thin. A nut viaua NTU sang tak a nih chuan tihfim a har a, tihfim theih loh khawp te pawh a ni thin.
April ni 17 atanga ni 20 velah khan Aizawl tui tlan Tlawng lui hi NTU 1000 chuang te a lo ni tawh a, chung lai phei chuan tui hi a nu a ni mai lo, a rimchhia an ti. Chumi hnuah a fim leh ta deuh a, May thla tirah NTU 1000 dawn dawn a ni leh ta a ni.
Tun hnai kum hnih kum thum velah Tlawng hi a nu zual an ti a, a hma pawhin a nu fo a, tun hnai kum hnih kum thum vela a nut dan hi a hmaa mi nena a inan lohna chu, a nut dan a nghet, an ti. A hma kha chuan a nut deuh pawhin an han nghak a, a fim leh mai thin a, tun hnaiah hi chuan a nu rei tlat zel an ti.
Aizawl mipuite tui tlan Tlawng lui a fim theih nan tanrual a ngaih thu an sawi a, mi tinin he lui hi a nu ang tih hlau ila, i fimkhur ang u, PHE department hotute chuan an ti.
Lak tlak loh khawpin Tlawng lui a nu
Get real time updates directly on you device, subscribe now.