Lakers tlawm tluang lai titawptu James

LeBron James chuan Nilaini khan hun tawp dawnah match winner a score a, Indiana Pacers lakah Los Angeles Lakers chakpuiin, game thum tlawn zawn mek Lakers chu hnehna kawngah a hruaikir leh ta a ni.
Pacers hhian second 42 chiah awm tawh tihah point khatin an la lead a, Lakers tlawm ni bawk herchhuak leh tura ngaihna a pian hman hnuah James chuan 120-119-a mikhual team chakna point hlu bik a score zui ta a ni.
Indianapolis inkhelah fourth quarter thlengin James khan field goal a puitlin zo lo a, mahse, hun a tawp meuh chuan point 13 bakah 13 rebounds leh seven assist a nei tling.
Hnehna lawm tur an neih leh tak hnuah Lakers coach J.J. Redick chuan an team chhandamtu James fakin, a tawp thlenga hruihrual a thlah duh lohna chu an hlawkpui leh ta niin a sawi.
Western conference lama palina luah mektu Lakers tan Doncic chuan 34 points, seven rebounds leh seven assists neiin, Austin Reaves (24 pts.) leh Rui Hachimura (14)-te’n an thawhhlawk ve bawk.
Nilaini inkhel dangah Washington Wizards pawhin vawinga an tlawm zawn mekna atangin Philadelphia 76ers hnehna an chang ve hlawl bawk a; Toronto Raptors pawhin 116-86-in Brooklyn Nets an hneh.
Nikola Jokic chuan 39 points a score a, tun kha season kal laia triple-double a neih vawi 30-na chiah niin, hliam a thawhsan hnuah Denver Nuggets chu Milwaukee Bucks lakah 127-117 hnehna a chanpui a; chetha tluang mar rei Boston Celtics chuan a zawna vawisarih an chak tlinna ni turin Phoenix Suns lakah 132-102 hnehna an sualchhuak leh.
Los Angeles Clippers pawhin play-off beiseina tinung zel turin 14 points-a an hnufual zet hnuah New York Knicks chu 126-113-in an hneh.