Lakhuihthei hralh chhuak tha

Mizorama lakhuihthei thar tam ber Sialhawk khuaa lakhuihthei chingtute chuan tunlai hian lakhuihthei an hralh mek a. July thla tawp lam atang hralh tanin, tun thlengin quintal 3580 an hralh tawh.
Sialhawka lakhuihthei chingtute hian kg. ah Rs. 12-a pe in, a thar tam vanglai a thleng chho mek a. Aizawl leh Mizoram khawpui hrang hrang bakah Silchar leh Karimganj-ah an hralh a ni.
Tunlai khaw chhhiaah lakhuihthei phurhchhuahna kawng, link road a chhiat nasat avangin duh angin an lachhuak thei lo tih an sawi a. Kawng chhe zual lai siamthatna atan hian Tuichang bialtu MLA, deputy chief minister Tawnluia chuan cheng nuai khat a pe a, Sialhawk Pineapple Grower Society chuan deputy chief minister chungah hian lawmthu an sawi a ni. Hetihlai hian, kawng chhia hi a nasat hlawm deuh avangin lakhuihthei phurh chhuah theih loh avanga hralh theih loh a awm lohna turin tanpuina awm thei ang anga tanpui turin sawrkar an ngen tih an sawi a ni.
Sialhawk lakhuihthei chingtute hian an lakhuihthei thar zinga market-a zawrh chhuah atana hralh tlak loh, a hmelhem leh pum te zual chu deputy chief minister hmalak puina in Mizoram Food Processing and Research Centre Selingah man tlawm zawk deuhin an hralh bawk a ni.
Sialhawk bakah hian Sialhawk chhehvel khua – Khawhai, Chalrang, New Chalrang, Vangtlang, Lungtan, Tlangmawi leh Tlangpui khua pawhin tunlai hian lakhuihthei an seng mek a ni.