Lamka-ah martar 35 vui dawn

Manipur-a Zo hnahthlakte leh Meitei inbeihnaa nunna chante zinga mi 35-te chu Ningani hian Lamka-ah vuiliam an ni dawn.
Churachandpur district-a Zo hnahthlak chi peng hrang hrangte intelkhawmna Indigenous Tribal Leaders Forum (ITLF) te’n nunna chante vuina hun hi buatsaih an tum a, hriat chian tawh mi 35-te vui an tum a ni.
ITLF hian Meitei nena an inbeihnaah hian mi 121-in nunna an chan tawh tiin an chhinchhiah a, a \hen chu Kangpokpi district mite niin, Kangpokpi district lamah hian vuiliam tawh an awm.
Lamka-a an District Hospital-ah ruang engemaw zat a awm a, chung zinga post mortem tih tawh, tu nge an nih hriat chian, dan hmanga tihfel ngai tihfel tawh mi 35 chu August ni 3 hian thlahliam an tum a ni.
ITLF hruaitute hnen a\anga thu dawn danin, nunna chan zat an chhinchhiah bakah hian an hriat rih loh te pawh an awmah an ngai a, tuna an chhinchhiah chinah pawh tihfel ngai la tihfel loh an awm.
Lamka-a Peace Ground-ah martar 35-te thlahna hun hi hman an tum a, puana tuamna hun leh pangpara thlahna hun te siamin, silai hmet puakin zahna lantir an ni ang. Mipui huapin hun hman an tum a, Pastor-in thu a sawi ang. Chumi zawhah martar-te phumna tur hmun atana an tihah Pastor-in a vuiliam ang.