Umbo tum Sentut leh sentet Mizoram atangin la umbo lo

Mizoram atanga umbo tum natna pahnih – sentut leh sentet chu hmuh tur ala awm zeuh zeuh reng a, umbo a nih theihna’n a hri danna lak ngaihpawimawh a tul hle tih sawi a ni. Sawrkar laipui chuan naupan lai atanga vei theih natna chi hnih – measles (sentut) leh rubella (sentet) ram puma umbo beihpui thlakna – Intensified Mission Indranush 5.0 a duang a. Kumin December-ah hi chuan umbo hman tum a ni. Mizoramah pawh beihpui thlak a ni a, August 7 atang hian a tawpna thawhkhatna tan tum niin, a thawh thumna thleng duan a ni a, October 14-ah a tawp ang.
Health department-a SIO (EPI) Dr Lalmuanawma Jongte chuan sentut leh sentet bakah natna kai theih dang, IMI 5.0 hnuaia hma lak telna chu a hri danna pe in theihtawp an chhuah tih a sawi a. Duh anga hma an lak chak theih lohna chu, Bru leh Chakma chen tamna leh lo neia eizawng tamna hmunah a ni, tiin, awmna hmun nghet nei loa insuankual thin te, an hun tam tak ram lama hmang thin te, an awmna tlawhpawh harsate a ni tih a sawi. Hri danna chungchang inzirtirnaah tawng lama inhriatpawh tawk loh thin vangin duhthu a sam lo thin tih a sawi bawk.
Chutihrualin, hri danna pek tum hian mitin tlawhpawh a, ke hnih nei lirthei takngial pawhin a tlawhpawh theih loh, kea kal ngai angte pawh an theih ang angin an luhchhuah a, raltlante thlengin he Mission hnuaiah hian hma an la tih a sawi a ni.
Damloh vang ni lo, dam tha renga ngaih, hri danna pe tura inchiu a ngai thin chu an harsatna pakhat niin a sawi bawk a. Hri danna ang chi hian khawsik a siam fo thin avangin nuten an fate an lak that tir duh lo thin tih a sawi bawk.
ASIO Dr B Lalthantluanga chuan Mizoten sentut kan veiin, a damdawi atan saisiak kan hmang tlangpui thin a. A nihna takah chuan hei hi a tawk zo lo hle tih a sawi. Mitdelna, thluak leh chuap thlenga a khawih theih avangin enkawl uluk ngai a ni a. Natna vei hnu ah tihdam tak damdawi a awm hran loh avangin a hri danna lak hi ngaihpawimawh a ngai tih a sawi. Sentet (rubella) pawh sentut angin na lo deuh mah se, a bikin nu naupaiin nau a pai atanga thla thum chhunga a vei chuan naute piansualna emaw nau chhiat emaw hial a thlen phah theih tih a sawi.
# World Health Organisation chhinchhiah danin tunhnaiah Mizoramah sentut (measles) kai 6 leh sentet (rubella) kai 3 hmuhchhuah an ni a. An kai ngei tih finfiah fak theih tawh si loh, an nat danah erawh rinhlelh loh theih loh 29 an awm bawk.
# IMI 5.0 hnuaiah Mizoramah sentut leh sentet kai theihna sang zual nia hriat khaw 190 thlan an ni a. Hengah hian he natna tih rem a nih theihna’n ruahmanna siam a ni.
# Kuminah IMI 5.0 hnuaia hmalaknaah hian round khatna August 7-12, round hnihna September 11-16, round thumna October 9-14 chhungin Mizoram pum tuam leh tum a ni.
# Mithiamte zirchiannaah hri danna lak vawikhatnaah hian he natna kai theih ‘chance’ hi zaa 85-in a veng a, tum hnih lak ngai niin, a tum hnihna lak hian zaa 95-in a veng thei a. Zaah za erawh hri danna reng reng hian a veng thei bik lo tih an sawi.
# Hri danna dose hnih hi naute thla 9 an tlinah leh thla 16 – 24 an tlin inkarah lak tura tih a ni a. Naupang kum 5 hnuailam chinah IMI 5.0 hnuaia hri danna lak hi kalpui a ni thung.