Lammual-ah Tribal Power Music Fest nei dawn

Ni hnih awh ‘Tribal Power Music Fest (Bukna Dik)’ chu Lammual-ah March ni 20 & 21, 2026 hian neih a ni dawn a, chhun leh zanah hun hman tur niin, University & College Beat Contest buatsaih a nih bakah Mizorama band tha leh zaithiam lar ten concert pui tham an nei bawk ang. He event hi Mizo rimawi khawvela hming dai tawh lo tur, band kan neih tawha an vanglaia huhang nei lian ber te zinga mi Tribal Power rimawi tribute niin, H&B Water Park bul tuma neih tur a ni.
He event ni khatna, March ni 20-ah hian chhun lamah Lammual-ah University & College Beat Contest a awm dawn a, hetah hian beat contest-a tel ten Tribal Power hla an duh duh panga leh anmahni la duh zawng hla dang pakhat hmangin an intihsiak ang a, zan lamah solo artist leh band lar tak tak ten concert an nei zui ang. A ni hnihna, March ni 21, chhunah beat contest final neih a ni ang a, zan lamah tunlai Mizo zaithiam leh band lar te bakah Tribal Power ten concert an nei zui leh ang a, best contest-a top 3-ah pawh an inlan nghal ang.
He music fest-a band perform turte pawh kan band neih that rual an ni a, a hming tumtu Tribal Power bakah Mood Station, Magdalene, Boomarang, Drop Doubt, The Prophets, Triau Traxx, Knot Band leh Sunset City te bakah beat contest a Top 3 te pawh concert-ah hian an perform nghal dawn a, band bakah zaithiam rual Ruatpuii, Bzi Tochhawng, Mimi Renthlei, Matilda Amawii, Lilzo, Youngfella, Lilac, Jaui, Siampuii Ralte, Youth Icon 2024 Lalsangliana (Taitea) leh Mizo Idol 2025 Immanuel te an zai dawn bawk e.
Entry Ticket Rs.100 man a ni dawn a, online ticket pawh ‘ticket.in’ a nimin atang khan a book theih tawh a, entry ticket hi lucky ticket a ni nghal dawn a, a vannei berin scooter a man anga, hei bakah hian mi vannei 20 tan consolation prize siam a ni a, thla khat chhung, April ni 1, 2026 atanga May ni 1, 2026 thleng chu H&B Water Park free entry ticket an dawng dawn a ni. Ticket atanga sum lut hi hospital hrang hrang, thlan bikah Poor Fund atan chhun luh tur a ni.
Music Fest buatsaihtu H&B Water Park hi Lungverh, Sakawrtuichhun sahuan piaha awm a ni a, Mizoram Tourism Department hnuaia awm a nih angin rêl a lo luh chhoh leh khualzin an rawn pun tâkah hian hnam dang khualzinte pawhin hmun tlawh tur bik an thlante zingah a tel ta fo a. Mizoram mipui tam zawkin he intihhlimna hmun kan neih, North East-a lian ber pahnihna hi zau zawk a kan lo hriat a, ram danga pawisa thahnem tak chawia insenso vak ngai loin kan ram a kan neih ve hi ram chhung mipuite’n kan hmelhriat a tha hle a. Chhungkua leh pawl, mimal, thianhoa intihhlimna hmun kan neih hi kan chhawr tangkai ve theih nan he event hi buatsaih a ni.