Lammual bula” ram neitute’n High Court ngaichang

Lammual bula” ram neitute’n High Court ngaichang
Lammual bul hnaia ram neitu mi 15 te’n an ram chungchangah Gauhati High Court, Aizawl Bench an pun a, court thu hi an ngaichang mek.
Mi 15-te hian sipai ram luah huam chhunga ram nei an inti lo a, an ram neihna hi sipai ram pawn a ni an ti.
Ram an neih dan pawh a dik thlap an ti a, dik lo taka ram nei ni lovin dan zawm thlapa ram nei, sorkarin a pek an inti.
Mi 15-te hi 2019-ah court-ah hian an kal a, court-a kal an tum thu leh, chuta tel duhte chuan hming pek tur tia tualchhung chanchinbua an chhuah hnuah, hming petu mi 15-te hi hemi kumah hian court-ah hian an kal ta a ni.
Land Owners Association Near AR Ground tia pawl hming phuahin an intelkhawm a, heta tel mi 15-te hian dan dik taka ram nei, District Council pek an inti.
An secretary B Zadingluaia’n The Aizawl Post a hrilh danin, court-a kalte hi dan dik taka ram nei an ni a, an ram neihna hi sipai ram a ni lo. Assam Gazette-ah an ram neihna hi sipai ram a ni lo a ti.
Assam Gazette-a sipai ram pawn chinah District Council-in ram an pe tiin a sawi a, District Council sorkar ngeiin harsatna a awm lo tiin a hun laiin a sawi niin a sawi.
District Council khan LSC a pek theih loh avangin house pass an pe a, UT nih hnuah UT sorkarah an house pass chu LSC-ah an let tih a sawi bawk.
2019-ah court-ah an kal a, mahse Covid-19 vangin court pawhin hna a thawk mumal thei lo a, chuvang chuan hun an la rei ta tiin a sawi a, court thu hi anni chuan an ngaichang tih a sawi bawk.