Oil palm tiak siamna tur hmun tlawh Hun hmasa lamah kan tisual – SPB V/C

Oil palm tiak siamna tur hmun tlawh
Hun hmasa lamah kan tisual – SPB V/C
Oil palm tiak siamna tur West Serzawla an buatsaih mek chu Nilaini khan State Planning Board hotuten an tlawh a. SPB vice chairman H Rammawi chuan hun hmasa lamah oil palm an buaipui danah tihsual an nei tih a sawi.
Mamit district W Serzawla Oil Palm Seed Garden siam hi Indian Council of Agriculture Research (ICAR) hnuaia Indian Institute of Oil Palm Research-in sum leh an thiamna hmanga an dinpui, Mizoram Agriculture department-in ram leh thil tul dang a lo buaipui a ni a. Ram hectare 15-a zauah tunah hian oil palm kung 1989 enkawl mek a ni.
He hmunah hian oil palm chi (variety) tha ber, Tenera variety tiak – sprout siam tum a ni a. India ramah oil palm seed siamna hi hmun 12 vel awmin, a tam zawk hi an dinna a rei tawh avangin an kal tha meuh tawh lo tih sawi a ni. India hmarchhakah Mizoram chiah hi hetiang hmun siamna tura ruahman a ni.
Oil palm chi siam tak tak tur hian laboratory din a ngai a, ICAR hian a hmunhma dinna atana mamawh engemawzat ti mah se, laboratory dinna tur erawh a tih sak hleithei loa, Mizoram sawrkar lam an hawi mek tih he hmun enkawltute chuan an sawi. Power supply an mamawh ang pawhluh chu an mamawh hle tih an sawi bawk.
Oil palm tiak hi kum 2025- 2026 velah chuan hralhchhuah theih an inbeisei a, tuna a tiak an neih theih hi nuai 5 chunglam niin, hei hi cheng vaibelchhe 3 chuang man a ni a. A tiak man hi state sawrkar kuta lut vek tur a ni tih an sawi.
Mizoram State Planning Board vice chairman chuan MNF sawrkar hmasaah oil palm hi bul an lo tan tawh a, hetihlai hian a chi hi Costa Rica atangin an la thin a, harsa taka an chi an lakluh hi Mizoram thlenpui a nih hnu in, sawrkar hotu lu atangtea la peng an tam lutuk avangin beisei angin a hlawhtling ta loa, a chinna hmun bik – compact area an siam lo kha an tih fuh loh lian tak a ni tih a sawi.
Mizoramah a tiak siamchhuah theih a nih chuan a hlu hle dawn tih sawiin, India sawrkarin oil palm chin beihpui a thlak mekah hmarchhaka ruahman sa a neihah Mizoram chu a beiseiawmna ber a nih avangin, hlawk taka sum ruahman awmsa pawh pawh luh a tul thu te a sawi a ni. Oil palm chin chu sawichhiatna awm thin mah se, a dik tawk lo thin tih sawiin, farmer-te dinchhuahna atan thil tha a ni tih a sawi. “Sawrkar hnathawkte aia farmer-te sum lakluh a tam hun hunah Mizoram a dingchhuak ang,” a ti.
Agriculture department hotute sawi danin, tun dinhmunah oil palm rah hi kg. ah Rs.10 chunglamin company-in farmer-te an leisak mek a, sawrkar laipuiin dan thar a siamah farmer-ten oil palm rah atang hian kg. ah Rs.13 aia tlem hmu lo tura a tih avangin, tuna an leisak theihna bak, Rs 13 a daih lohna zawng hi a rawn tumsak a, an account ah a thunsak mai thin tih an sawi.