Lammual min pe turin Pathian kan dil Court-a kalten hnukkir thei se kan duh – Chief minister
Aizawl Sipai Lammual chu Assam Rifles kut atanga Mizo mipui kuta pe turin State Day of Prayer-ah an dil a, hun harsa paltlangin tun hi an thleng ta tih chief minister chuan a sawi a. Pathianin mipui tan a pe tih hria a, helaia ram neitu, court-a kal mekte pawhin hnukkir thei se an duh hle tih a sawi. ZPM Gen. Hqrs buatsaihin Aizawl laili atanga Assam Rifles ram chhuahsan avanga Pathian hnena lawmthu sawina chu Ningani khan Aizawlah hman a ni a. Chief minister Lalduhoma chuan an sawrkar atanga thla thumna, 2024 February 20 khan Pathian hnena tawngtairual, State Day of Prayer hun Sipai Lammualah an hmang a, hemi tum hian Pathian hnenah Assam Rifles ram hi an dil tih a sawi.
Hemi hnu hian sawrkar laipui hotute dawrin, Mizoram sawrkara a khaihhnawih department hrang hrang leh AR hotute nen an thukhawm a. An tanna ngai ve ve ah an tang a, hma erawh an sawn lo hle tih a sawi. Ngaihtuahna thar puin Delhi lamah an tlankhalh a, Prime minister nen sawidun lehin, Defence minister bakah Chief of Army Staff leh Assam Rifle DG ni mek leh a thlaktu tur DG tharte an sawipui a. Hemi hnu hian Union Home minister hmu lehin, 2024 August 25-ah Assam Rifles DG thar Gen. Vikas Lakhera chuan a bangla ah rawn tlawhin an sawi dun a, AR hmunhma pawh an fangdun a. Chuta tang chuan inthianthatna hmangin hmasawnna an hmu chho ta hret hret tih a sawi.
An ram chhuahsan tur chinah erawh thu inchuh an nei zeuh zeuh naa, a thawhpuiten thahnemngai takin hma an la zel a, Pathian hruainain tun hi an thleng ta tih a sawi a ni.
“AR insawn chhuah chungchangah hian sawrkar hmasate pawhin thuitak kawng an lo sial tawh a, hma an lakna a fakawm kan ti a, lawmthu kan sawi a ni. Hemi ram chhunga ram nei mi 13-in vantlang tan an ram an pe hi lawmthu kan sawi. Chutih rualin court-a sawrkar khing mek 11 an awm a, he ram hi British hunlaia AR ram atana pek daih tawh a ni a. Chuvangin helaia hmun neitute pawhin Pathianin helai hmun hi mipui tan a pe a ni tih hria a, court-a thukal mek hi hnukkir thei se kan duh hle,” chief minister hian a ti.
Lammual leh a chhehvel ram hman dan ngaihtuah tur Committee an din tawh a political party tin aiawh an tel dawn tih a sawi a. He Committee hi thutawp reltu tur a ni a, NGO lam pawhin Committee thu hi ngaichang turin an ngen tih a sawi a ni.
Revenue minister B Lalchhanzova sawi danin:
8 Kum 1952 Assam gazzette-ah Assam Rifles ram chhungah hian mi 10-in ram an nei a, an ni bakah kum 2005 khan PHE-in pass, DLL113 of 2005 an lo nei bawk.
8 Kum 2002 khan sawrkar chuan Assam Rifles ram hi rin tha in, ram nei mi 54 an lo awm ta a, heng mimal ram neitute hi show cause notice pek an nih hnuin, an zinga mi 13-in an ram an surrender a, mi 3 hi chin hriat loh niin, mi 11-in High Court-ah sawrkar an khing mek. Tuna sawrkarin chinfel a mamawh chu mi 38 an ni.
8 Kum 2006 khan AR chhuahna atan sawrkar chuan Zokhawsangah hmun a pe a, chhuanlam hrang hrang siamin Aizawl lailai hi AR hian chhuahsan an harsat hle a, ZPM sawrkar hnu ah chief minister Pu Lalduhoma leh a thawhpuite hmalakna in 2024 October 23 khan memorandum of agreement ziahfel a ni ta a ni.