National Institute of Electronics & Information Technology (NIELIT) Aizawl hotute chu Nilaini khan larsap Dr Hari Babu Kambhampati chuan Raj Bhavan-ah a titi pui a. NIELIT-in Mizorama an hmalakna leh an thlenchinte a zawtin changtlung zawka kalpui dan turte sawi ho a ni.
Larsap chuan eng hnaah pawh computer thiam a ngaih tak deuh vek avangin information technology lam thiamnaa tan lak a ngai tih a sawi a. Sawrkar laipui hnuaia din, a zirna pawh central duhdan thlapa duan NIELIT hnuaia computer thiamna zir chu state chhung leh pawna hna zawng tur tana thil pawimawh tak a ni tih a sawi.
NIELIT Aizawl leh Lunglei Centre atanga hmalakna hrang hrang, program leh course zir theih, zirlai kum khata admission pek theih zat, zirna kaihhnawih thil, bungrua leh khawl chungchang bakah an harsatna tawhte larsap hian a zawt a. NIELIT Aizawl director -in- charge T Gunendra Singh leh officer dangten powerpoint presentation hmangin NIELIT hmalakna, thlenchin, hmachhawp leh an harsatna te an sawifiah.
NIELIT-in computer leh a kaihhnawih thil zirtirna hrang hrang a kalpui chu a tha thawkhat nia a hriat thu larsap hian a sawi a. NIELIT atang diploma neiten Mizoram sawrkar hnuaiah LDC hna an dil ve thei lo lai chu zirchian a, sawrkar thuneitute sawipui a tum thu a hrilh. Sawrkar laipui lama NIELIT mamawhte pawh a tul angin Ministry of Electronics & Information Technology thuneitute hnenah bawhzui sak a inhuam thu a sawi a ni.
Report-a a lan danin, kum khat chhungin zirlai 3000 vel NIELIT-ah hian course hrang hrang hnuaiah ziahluh thin an ni a. Mi 51 awm theihna hmeichhe hostel leh mi 82 awm theihna mipa hostel an nei. NIELIT hnuaia zirna hi chi thum – formal, non-formal leh short term course anga kalpui a ni.
Larsap hnenah NIELIT dinhmun hrilh
Get real time updates directly on you device, subscribe now.