Thisen far tawp thlenga an tan tur thu Amit Shah hrilh

Manipur-ah Zo hnahthlakte leh Meitei karah buaina
a chhuak a, he buaina bul hi Meitei-in Zo hnahthlakte ram an chuh vang a ni ber. India ram home minister Amit Shah-a’n Thawhlehni khan Zo hnahthlakte hi a kawm a, mahni ram humhim tura an thisen far tawp thlenga an tan tur thu Amit Shah hi an hrilh.
He buaina vanga Manipur-a zin Amit Shah hi Zo hnahthlak lam hian Thawhlehni tlai lamah khan an kawm a, Zo hnahthlak pawl hrang hrang hruaitute an kal.
Hmeichhe lam aiawh an tel a, he huna telte hnen atanga thu dawn danin, hmeichhe pawl aiawha telte hian Manipur-a tlang ram, an chenna chu pi leh pute atanga an ram a nih thu sawiin, kan ram humhim tur hian kan thisen far tawp thlengin kan bei ang tiin Amit Shah hi an hrilh.
Meitei-in Zo hnahthlakte hi pem lut angin an sawi tih te, Chinese tiin an sawi tih an sawi a, pem lut an nih loh thu, pi leh pute atanga an ram a nih thu sawiin, ‘Kan awmna hi kan pi leh pute atanga kan awmna, kan ram a ni a, kan thisen far tawp thlengin kan tang dawn,’ tiin an hrilh a ni.
He huna telte sawi danin, Zo hnahthlakte hian tuna an awmna hi pi leh pute atanga an awmna, an ram a nih thu an sawi a, “Ziakin kan thehlut a, a hmain kan lo thehlut tawh bawk a, tawngkain kan sawi bawk a,” a tel ve pakhat chuan a ti.
Inrelbawlna hran an duh thu an sawi a, ‘Meitei nen hian awmho thei kan ni tawh lo,’ tiin kan sawi a, tun hma atanga Meitei-in min tih dan lawmawm lo tak tak te pawh kan sawi, an ti.
Mizorama mite nen unau, hnam khat an nih thu an sawi a, tuna buaina a chhuah pawhin Manipur sorkarin a tuartute a puih ve miah loh laiin Mizoramin eitur leh damdawi lamah te a pui tih an sawi bawk.
Amit Shah hian inrelbawlna hran an duhna chungchangah hian sawi a nei lo a, tuna thil pawimawh hmasa chu remna leh muanna a ni tiin, chumi hnuah political solution chu ngaihtuah a ni ang tiin a sawi.
Buaina tuartute puihna pawh Delhi atanga ngaihtuah a nih tur thu a sawi a, tanpuina metric ton 30 thawn thuai a ni ang a, metric ton 20 chu tribal te chan tur, metric ton 10 chu Meitei lam chan tur tiin a chhang a ni.
Zo hnahthlak lamah hian Simte Tribe Council, Hmar Inpui, Paite Tribe Council, Vaiphei People’s Council, Gangte Tribe Union, Mizo People’s Convention, Kuki Inpi, United Zou Organisation leh lal aiawhte an tel; Manipur-a Zo hnahthlakte hian lal an la nei a ni. Chi peng hrang hrang atang hian zirlai pawl leh hmeichhe pawl aiawh an tel bawk. Mi 32 vel an ni a, Amit Shah hi darkar hnih vel an kawm.
Amit Shah hian Nilaini-ah Moreh tlawhin a tukah Kangpokpi a tlawh leh ang a, hetah pawh hian Zo hnahthlak lam a kawm leh ang.