Larsap-in House-ah thu a sawi “Mipuiin kalphung thar an duh”

Mizoram Legislative Assembly vawi 9-na thutkhawm vawikhatnaah larsap Dr Hari Babu Kambhampati chuan thu a sawi a. A sawrkarin ministry thar hnuaiah state hmasawnna leh intodelhna atana hmalak dan tur tlangpui leh a hawilam a puang a. MLA inthlanpui neih zawh tak result chuan mipuiin kalphung thar an duh tawh tih a tihlan thu a sawi.

Larsap chuan MLA inthlanpui neih zawh takah mipui tam tak an tel a, vote tla zat za zela 80.43 a ni tih a sawi a. Hei hian Mizoram mipuiin a hma aiin inthlan an ngaihven sawt a, an a rualawhna hriatthiampui thei ber tura ngaih sawrkar thlan kawngah an mawhphurhna pawimawh zia an hre thar a, a lawmawm takzet tiin a sawi a ni.
MLA thlantlinte lawmpuina leh duhsakna a hlan a. A bikin a vawi khatna atana thlantlin member 23 te a lawmpui tih a sawi. Hmeichhe pathum thlantlin chu Mizoram Legislative history-ah a la awm ngai lo tih sawiin, “Hei hi Mizorama hmeichhiate hlawhtlinna ropui tak a ni a. An hlawhtlinna hian state puma hmeichhiate tan phurna thar a pek ngei ka ring,” a ti.
Inthlanna zalen leh felfai tak kan neihna kawngah sawrkar hnathawkte inpekna bakah NGO leh kohhran leh mipui thlawpna a ropui a tih thu larsap hian a sawi a. Mizoram People’s Forum-in hna a thawk tha tih a sawi bawk.
MLA thlan tharte chu an bial mipuiin an lakah beisei sang tak neia an thlan tlin an nih angin, bial enkawl leh hmasawnna turah mipui beiseina tithlawn lo turin a chah.
“He inthlan result hian mipuiin system thar – ‘kalphung thar’ an duh a ni tih a tilang a, democracy kalphung inthlak danglamna kawngah mipui rinna nghet tak a lantir a ni,” a ti.
Mizoram chuan chak takin hmasawnna kawng a zawh a, state hmasawn ni zel turin theihna a awm bawk a. Chutihrualin tih tur hmabak a la tam a, sawrkarin a mamawh tihpuitlin a tumna kawngah leiba chhekkhawl tam zawnga a kal zel avangin dinhmun hlauhthawn awm takah state economy a awm a, chumi siamthat bul tanna atan chuan a sawrkar chu inrenchem takin a kal dawn tih a sawi bawk.
Larsap hian mipuiin sawrkar thlawp tlat turin a ngen a, state sawrkarin a hmachhawp hrang hrang a ngaihpawimawh turte a sawi a ni.