Larsap-in Kolasib district a tlawh

Larsap-in Kolasib district a tlawh
Mizoram larsap Gen Vijay Kumar Singh (Retd) chuan Inrinni khan Kolasib a tlawh a, sawrkar department hotute, khawtlang leh tlawmngai pawl hruaitute a kawm.
Kolasib district chu Mizoram luhka leh chak lakna pawimawh a nih avangin larsap a nih hnua tlawh hmasak berah a nei tih sawiin, an district chhunga national highway thawmthat hna kalmuang chuan mipui harsatna nasa takin a thlen a ni tih a sawi. NHIDCL hnuaia four lane kawng laih turah compensation leh forest clearance chungchangah harsatna tamtak sutkian a ni tawh, tiin, hna thawh theih hun chhung a tlem avangin NHIDCL hotute chu a rang thei ang bera chak taka hma la tur hrilh a; harsatna a awm a nih pawhin amah hrilhhre zel turin a hrilh bawk.
Dan leh thupek kenkawh kawngah thawktu indaihlo chunga enforcement agency-ten theihtawp an chhuah thin chu lawmawm a tih thu sawiin, thalaite nun tibuaia ram tana hmelma lian tak ni mek ruihhlo do kawngah tan lak lehzual a tul a, ruihhlo tawlhruk engemawzat man ni mah se, man loha kaltlang a awm nual avangin hemi kawngah hian a huhoa tanrual a tul tih a sawi a ni.
Sawrkar laipuiin mipui hamthatna turin scheme tha tak tak a duan chuan mipui hnen a thlen a, a tum ang tak a thawh theihna atana hma lak chu kan tihmakmawh a ni tuh larsap hian a sawi a. Lo neih leh huan thlai siam kawngah tan lak zual a ngai, tiin, “Thar chhuah mai nilo, a hralh chhuahna tur lam thlenga kan ngaihtuah tel a ngai a, agency hrang hrang nen inthlunzawm kan mamawh a ni. Hmunhma nghet nei loa tlangram lo neih hian nghawng thui tak a nei a, nakin hun daih tur lo neih dan tha zawk leh hlawk zawk kan ngaihtuah a pawimawh a, hemi kawngah hian mithiamten loneitute kan puih a tul hle,” a ti.
Kolasib district bawrhsap Robert C Lalhmangaiha chuan an district chanchin powerpoint presentation hmangin a sawifiah a; Kolasib SP David H Lalthangliana’n venhimna kaihhnawih hmalakna powerpoint presentation hmang thoin a sawifiah ve leh a ni.
Sawrkar office hrang hrang hotute, khawtlang leh tlawmngai pawl hruaitute nen hian darkar hnih dawn an inkawm a ni.