Larsap-in Zokhua, PHC leh KVK tlawh

Mizoram larsap lailawk Indra Sena Reddy Nallu chuan Thawhtannia Raj Bhavan-a rinawmna thutiam a lak zawh veleh a pisa a kai a, hemi hnu hian a official program hmasaberah Fakawna Zokhua leh Aibawk a tlawh a. Thawhlehni khan Krishi Vigyan Kendra (KVK) Aizawl leh College of Veterinary Science & AH, Central Agricultural University (CAU) Selesih a tlawh leh bawk.
Falkawna Zokhua a tlawh hnu hian Aibawkah primary health centre, school leh biak in thenkhat a tlawh a. Larsap pual hian Aibawk BDO Complex-ah hun hman niin, village council member ho leh YMA hruaitute, kohhran hruaitute leh khawtlang hruaitute nen an inkawm a ni.
CVSc&AH Selesih a tlawhnaah hian dean Dr Lalnuntluangi Hmar hoin thawktuten an lo dawngsawng a. KVK faculty, staff leh loneitute nen an inkawm nghal bawk.
Faculty member-te hnenah an hmalak mek leh hmachhawp zawtin, Mizoram loneitute tan hmasawnna rahbi tuk sak ngei turin a fuih. Loneitu leh huan neitute pawh an hmalakna zawtin, tam zawk leh hlawk zawka thlai leh thei an thara an dehral theih nan KVK mithiamte rawn nachang hre turin a chah a ni. Loneitute chu tunlai thiamna mila an lo leh huan an enkawl a, ran an vulh theih nan training a tel tam turin a chah a. KVK hotute hnenah ranvulhmi, loneitute uar zawka training buatsaih turin a chah a ni.
Larsap hian KVK Aizawl Exhibition Centre tlawh nghalin, KVK kaltlanga hmalakna – buh chi hrang hrang, thlai leh thei hring, pickle, hmanraw hrang hrang, lei tha, rannung thahna hlo, leitha phul, drone adt. phohchhuah chu a en a ni. KVK Aizawl demonstration farm fangin soil testing laboratory, vermi-compost unit, sangha dil leh thlai chinna greenhouse a tlawh bawk.
CVsc&AH farm a thlawh leh a. Ran chi hrang hrang – bawng, vawk, kel, beram vulhna unit bakah Department of Livestock Production Management a tlawh a, thawktu a kawm a ni.