Last 4 lut hmasaber Sabalenka

Last 4 lut hmasaber Sabalenka
Hmeichhe tennis season kharna WTA Finals khelh mekah top seed Aryna Sabalenka chu semi-final chuangkai hmasaber niin, Thawhtanni zan khan straight sets hmangin Jasmine Paolini a hneh a, a game khelh hnuhnung 23-ah Belarusian hi tum 22 a chak tling!
Saudi Arabia khawpui Riyadh-a season-ending tournament-ah hian Sabalenka chuan 6-3 7-5-in Paolini a hneh a, he result avang hian Purple Group lamah Elena Rybakina tan last four luhna kawng a ping zui ta a ni.
Kazakhstan nula Rybakina hi inkhel dangah 7-6 (7-4) 3-6 6-1-in Olympic champion Zheng Qinwen chuan a hneh a, a match hmasa bera lo tlawm tawh Rybakina tana semi-final luh beiseina nei zui thei turin inkhel dangah kum 28-a upa ni tawh Paolini a chak a ngai a, mahse, Sabalenka laka Italian a tlawm zui ve leh tak avangin Rybakina beiseina a tawp chiang ta a ni.
Kum 26 mi Sabalenka hian a career-a a WTA Finals title hmasaber hlawhchhuak turin vawihnih chiah chak a mamawh tawh a; world number one ranking nena kum khar thei turin zanina a Purple Group match hnuhnungberah Rybakina a hneh a ngai bawk a, a chak leh a nih chuan Iga Swiatek tan kumin bikah Belarusian hi ranking-a lehpelh ngaihna a awm tawh dawn lo a ni.
Kumina Grand Slam title pahnih la tling Sabalenka hian fourth seed Paolini lakah awlsam takin set khatna la mai mah se set hnihna erawh a tan a awlsam bik lo a, Italian player tan khawh khan a chhaihbuai ve viau a ni.
Orange Group lamah World No. 3 Coco Gauff leh No. 2 Iga Swiatek of Poland-te’n an opening match-ah hnehna chang ve vein, American Gauff hian 6-3, 6-2-in world number 6 Jessica Pegula a hneh a; Pole Swiatek chuan set khatna hloh zet chungin Wimbledon champion Barbora Krejcikova of the Czech Republic lakah 4-6, 7-5, 6-2 hnehna a sualchhuak ve bawk.
Gauff leh Swiatek hi nizan result tarlan hman lohah inhmachhawn zui lehin, a chak zawk zawk hian Orange Group an thunun dawn a, head-to-head record-a 11-1-a chungnung zawk Swiatek chu Gauff laka rinkai zawk a ni.
Tarlan tawh thin angin, WTA Finals hi a vawikhatna atan Saudi Arabia-ah nghah niin, he ram hian human rights record chhe tak a neih avangin kum kharna tournament ngaihhlut hlawh an nghah dawn pawh khan sawiselna a ring hle a, mahse, sum an ngah a, tournament organiser lamin an nep zo lo a ni ber a, kumin hi he tournament bika prize money tam ber tum niin, singles champion hian pound maktaduai 4 tehreng an humhaw dawn a ni!