Lauryn Hill-i’n BET Living Legend Icon Award dawng dawn

June ni 28 Peacock Theater, Los Angeles-a sem tur 2026 BET Awards-a Lauryn Hill chuan Living Legend Icon Award a dawng dawn tih an puang. He award semna show hi Durski-a’n a host dawn a ni.
Living Legend Icon Award hi an themthiamna te tat hriam a, culture kalsan lova an kalna kawnga sul sutu leh kawngsialtu te chawimawi nana an pek thin niin BET chuan an tarlang. BET Award hi entertainment khawvela mihang chetha te chawimawina a ni.
Connie Orlando, EVP cuan “Ms. Lauryn Hill hi living legend sawifiahna dik tak chu a ni. Chhuan hrang hrangah han hnungtawlh deuh pawh nei lovin a intuaithar zel a. A themthiamna hian hian chhuanthar zawk te tan kawng sialin, rimawi lama huaisen tak leh rau tak bakah zalen taka an chet theihna kawng a hawng a ni. Kan Culture tana Zan Ropuia hian ani kan chawimawi thei tur hi kan lawm hle a ni,” a ti.
Lauryn Hill, kum 51, hi The Fugees member anga hmin rawn chher hmasa a ni a, 1996-a an album The Score chu Billboard 200 (US albums) chart-ah kar li chhung a No.1 a, 1998 khan a solo album hmasa ber ‘The Miseducation of Lauryn Hill’ tlangzarhin, hei pawh hi Billboard 200 chart-ah kar li a No.1 thei a, he album-a hla ‘Doo Wop (That Thing)” chu Billboard Hot 100 (US singles) chart-ah a No.1 thei bawk. He album hian Grammy-ah album of the year a dawng a, hip-hop album zinga he award dawng thei hmasa ber niin, hemi tum hian award panga a dawng a, hmeichhe zaithiam zinga tum khata Grammy Award panga dawng thei hmasa ber a ni bawk. He album hi National Recording Registry-ah 2014 khan dah luh a ni tawh a, 2024 khan Grammy Hall of Fame-ah lak luh a ni tawh bawk.
BET Award-ah hian Living Legend Icon Award hi an telh thar niin, Lauryn Hill a dawng hmasa ber a ni dawn ta a ni. 2015 khan BET Award-ah hian Ultimate Icon Award an telh tan a, Janet Jackson chu he award dawng hmasa ber niin, nikum khan a vawi khat nan mi pali- Maria Carey, Jamie Foxx, Snoop Dogg leh Kirk Franklin ten an dawng.