Lawng hmanga inkalpawhna tur sawi

Transport minister TJ Lalnuntluanga chuan Mizoram
sorkarin lawng hmanga inkalpawhna tura hma a lak mekna chungchang a sawi a, Mizoram chhung leh Mizoram pawn nena inkalpawhna tur te a nih thu a sawi.
Ningani khan a demand sawihonaah a hmawrbawkna hun hmangin minister hian transport department hnuaia lawng hmanga inkalpawhna (inland waterways) atana hmalakna a sawi a, Covid- 19 hripui lengin kum hnih zet min chenchilh avangin duhthusamin hmalak chak theih a ni lo tiin a sawi.
Tlawng lui chu National Waterway- 102 a nih thu a sawi a, tangkai zawka hman a nih theih nan transport department-in Ministry of Ports, Shipping & Waterways, Govt. of India-ah Hydrographic Survey and Techno Economic Feasibility Study nei turin rawtna an thlen a, sorkar laipui thuthlukna ngaihchan mek a ni tih a sawi.
Bangladesh nena insumdawn tawnna tihhmasawnna atan Khawthlangtuipui lui-ah IWT Project, cheng vaibelchhe 22.93 senna tur kalpui mek a nih thu a sawi a, a thawktu tur thlang turin Open E- Tender February ni 16 khan chhuah a ni tih a sawi.
Chhimtuipui Lui-ah IWT Project kalpui turin survey neih tawh a nih thu leh survey report hmangin DPR siam tura hmalak mek a nih thu a sawi a, Khawthlangtuipui Lui-ah Rajivnagar khua atanga Tuichawng kai thlengin IWT Project kalpui a nih theihna turin Ministry of Ports, Shipping & Waterways hnenah Hydrographic Survey and Techno Economic Feasibility Study nei turin rawtna thehlut tawh a nih thu a sawi.
Tuivai hman tangkai a nih theihna turin National Waterway – 6 (Barak river) chu Tipaimukh thlenga lawng kal theihna turin dil a ni tih a sawi a, Lawngtlai District-a Chhimtuipui Lui-a Maurawp kai, Tlengang leh Lungtian khua inkarah inkalpawhna tha zawk leh awlsam zawk a awm theihna atan Maurawp kaiah Mar-Boat service siam tum a nih thu a sawi.
Aizawl leh Phuldungsei (Tripura) inkarah Hnam Inpumkhatna bus tlantir a nih thu leh Aizawl leh Imphal inkarah pawh rei lo teah tlantir tum a nih thu a sawi.
A department chan dang Environment, Forests & Climate Change department chungchangah boruak tha hralh (carbon trading) project, ram leh mipuite tana chhenfakawm tura duan a nih thu a sawi a, he project hi US Dollar vaibelchhe khat hial a chaw lut thei tura beisei a nih thu a sawi.
Aizawl Zoo-ah ramsa chi hrang hrang dah belh a nih thu a sawi a, sakei pakhat Guwahati Zoo atangin exchange program hmanga lakluh a nih tawh thu sawiin, remchang hmasa berah Nandankanan Zoo, Bhubaneswar, Orissa atangin sakei pahnih lakluh belh tum a nih thu te, sahuan ram tihzauh tum a nih thu te a sawi bawk.