Lawngtlaia mega workshop cum exhibition

Nimin khan Krishi Vigyan Kendra (KVK), Lawngtlai chuan KVK Complex, Chawnhuah Natural Farming programme hnuaiah mega workshop/seminar cum exhibition an buatsaih a. Natural farming chungchang zirhona leh inzirtirna hun hman a ni.
He hun hi Central Young Lai Association (CYLA) President HC Vanlalruatpuia chuan khuallian niin a hmanpui a. Exhibition hawngin, KVK leh a hnuaia kut hna thawktute’n an thil thar chhuah leh siam chhuah an phote chu a tlawh kual a. KVK Lawngtlaiin “Natural Farming chanchin kimchang” tih technical bulletin an buatsaih chu tlangzarhin, lo neitute fuihna thu a sawi.
Technical session hi KVK Lawngtlaia Senior Scientist & Head Dr C. Lalfakawma chuan kaihruaiin, hun hman chhan a sawi fiah a. Vanlalmalsawmi Sailo, Subject Matter Specialist (Soil Science) leh Programme Co-ordinator (Natural Farming Project) chuan loneitu kal khawmte hnenah zirtirna a pe a. Lawngtlai District-a line department hrang hrang hotute pawhin thu an sawi bawk.
He hunah hian exhibition buatsaih a nih bakah, a thlawna ran damlo entirna, animal free clinic buatsaih a ni bawk.