Lawngtlaiah Rakhine mi enzui mek

Myanmar Rakhine state atangin Rakhine mi Lawngtlaiah bungrua leh thildang tiin dan loa teikual thin an awm nia sawi chungchangah Lawngtlai district bawrhsap chuan khawpui chhung bakah ramri lamah khauh zawka enzui mek a ni tih a sawi.
Lawngtlai district-a raltlan leh nitin mamawh chungchang ngaihtuahin Ningani khan bawrhsap Cheemala Siva Gopal Reddy hoin a kaihhnawih sawrkar hotute leh tlawmngai pawl hruaitute an thutkhawm.
Bawrhsap chuan Young Lai Association (YLA) hminga sum khawn duh vanga ‘essential commodities’ phur lirthei dang thin an awm nia a hriat thu sawiin, hei hian YLA hming a tichhe thei dawn a, pawisa khawn chingte zawng chhuak a, a tul anga hma lakpui turin Central YLA hruaitute a sawm tih a sawi.
Zalen taka sumdawnna a kal tul a; Mizoramin tuialhthei a lakna Assam lama lei chim vangin tuialhthei duh khawp hmuh loh thin pawh harsatna a awm tawh loa, district mamawh zat tuialhthei a awm tih a sawi a ni.
Myanmar leh Bangladesh ram buai vangin Lawngtlai district-ah raltlan tam tak an lo lut a, fimkhur taka hma lak erawh a tul tih Cheemala Siva Gopal Reddy hian a sawi. An district-a raltlan awm mekte nawrchhuah tumna a awm loh rualin, a hranpaa sawrkar atanga raltlan tanpuina a awm loh avangin raltlan tam zawk lo lut erawh kan dawl zo dawn loa, kan dawl zawh tawk hriat a tul tih a sawi bawk.
Lawngtlaiah Rakhine state mi an awm tih thawm a hriat thu bawrhsap hian sawiin, Assam Rifles hotute nen an sawiho tawh a. Khauh zawka ramri veng tura hma lak a nih bakah zing leh khauh zawkin police patrolling kalpui a ni tih a sawi. NGO ngen anga ‘security check post’ tam zawk siam chu thil pawimawh a ni tiin, thuneitu sang hnena thlen a, a tul anga hma lak a ni dawn tih a sawi.
Central YLA hruaitute chuan dan loa sumdawnna a awm vangin tuialhthei phur (tanker) dan a ni tih an sawi a. Mipui tana harsatna thlen tumna engmah a awm lo, an ti. Bungraw phur lirthei bikah dan phal loh phur an awm leh awm loh erawh endik thin a ni a, dan ang thlapa bungraw phurte chu dan a ni ngai lo tih an sawi a ni. CYLA chu tlawmngai pawl a nih angin, mipui tana thawk an nih piahlamah sawrkar tha tichak turin an awm reng tih an sawi bawk.
Bawrhsap hnenah district mipuiin hnianghnar taka tuialhthei an neih nana stock monitor a, Rakhine mi Lawngtlai district-a lutchhuak felfai taka chhinchhiah a, Lawngtlaia hotel neiten valid ID an phut zel tawh nan hma la a, an district-a Bawm raltlan lokal nawr let loa, district mipui an him zawknan thingtlang khua lama security check post leh temporary beat post dah turte in ngenna an thlen a ni.