LC/VC level thlengin kalphung thar rilru pu mi khawtlang hruaitu kan mamawh – ZPM secretary general

LC/VC level thlengin kalphung thar rilru
pu mi khawtlang hruaitu kan mamawh
– ZPM secretary general
Ram kalphung dik lo, siamthat ngai an hmu chho hnem ta hle a, ram siamtha tak tak tur chuan LC/VC level thlenga kalphung thar mipui sawrkar rilru pu mi khawtlang hruaitu an mamawh ZPM secretary general Er. Vanlalneiha Ralte chuan a sawi.
VC inthlan atana Thenzawl leh Serchhipa campaign-a fehchhuak ZPM secretary general chuan, ZPM party chu ram hmangaihna leh veina thinlung tak tak pua ram rawngbawl tura pen chhuak an ni a, kumkhat lek sawrkarna an chelh chhungin an rin phak bakin ram kalphung a lo dik tawh loa, siamthat ngai an hmu chho hnem ta hle tih a sawi.
“VC level thlengin khawtlang hmasawnna tura sawrkar hmalakna, a nih tur ang ni lo tam tak a awm a ni. Kan ram siamtha tak tak tur chuan LC/VC level thlenga kalphung thar mipui sawrkar rilru pu mi khawtlang hruaitu kan mamawh a ni,” a ti.
Kan ram budget a nihna tur ang takin lo hmang thin ni ila, ZPM party pawh hi a din a ngai dawn lo tih sawiin, thenkhatin meialh ena chawkaw puar pawh an hmuh mang loh laiin, a thei faten chawm bawk hawp bawkin an duh dan danin ram sum leh pai an enkawl a, mipui kan rum tih Er Vanlalneiha Ralte hian a sawi. “Thluaka sum lut, tih tawngkam hial pawh kohhran hruaituten an chhak chhuak ta a. Kan ram siamtha tak tak tur chuan state sawrkar atanga village council thlengin kalphung thar kan lo mamawh takzet tawh. Kalphung thar policy hmanga khawtlang siamtha tur ZPM VC candidate-te mipuiin min vote tlin sak turin ka ngen a ni,” a ti.