League season kal laia Barca tlawm vawi khatna

League season kal laia Barca tlawm vawi khatna
Real Madrid laka an hmahruaina neikir leh tura chak mamawh Barcelona chuan Pathianni zanah season kal lai league-a an tlawm vawi khatna an tawngbaw ve ta nge nge a, kum 1951-a sili faia an ngam loh hnua Sevilla laka an tlawm nat leh ber hun tawngin Ramon Sanchez Pizjuan stadium-ah Hansi Flick-a team hi 1-4-in an chak lo a, khelh riata point 19 hum chungin vawi khat tlawma tum sarih dang chak vek Bernabeu club-in La Liga hma an hruai chhunzawm rih dawn.
He inkhelah hian minute 13-na lekah mikhual team hian penalty an chawi a, Barca captain Ronald Araujo laka Isaac Romero hlawhchhuah penalty atangin Barcelona winger hlui Alexis Sanchez chuan mualneitu team hmahruaina goal a chhuihlut.
Minute 37-ah penalty hlawhchhuaktu Romero chuan counter-attack atangin Sevilla goal hnihna a thawh ve leh.
Chawlhlawk dawn hun pekbelh minute sarihna kal mek laiin Marcus Rashford chuan Pedri back-post cross atanga a ball tha hmuh hmangin mikhual si phurh pakhat zawk a sut then.
Robert Lewandowski chuan second-half penalty thun thelhin Barcelona si phurh ut zawh theihna hun remchang a bawhpelh.
Last minute-ah Jose Angel Carmona chuan Sevilla goal thumna thawh ve lehin, hun pekbelh minute ruknaah substitute Akor Adams chuan mikhual goal lina a thun zui ve leh a, Champions League lama champ lai Paris St-Germain laka tlawm hlim Catalan team-in league season kal laia a vawi khatna atan chak loh boruak an tem ve ta nge nge a, thang khat lian zet Spanish top flight-a an hneh theih ngai loh lakah Sevilla-in chak an lawm ve leh ta a ni.
Hansi Flick-a team kha hun rei zawk khel chhe zawkah an tang ve hrim hrim a; goal-ah an luck lo tel lehzel a; Alejandro Balde laka Manchester United winger Adnan Januzaj penalty chawi veteran Lewandowski-a’n a han thun lote kha an chak loh hri ve hrim hrim niin a lang!
Barca hi Inrinnia an hmahruaina chhuhsaktu Real Madrid lakah point hnihin an hniam chhunzawm zel a; Sevilla hian pangana luah hman en rawn mah se Pathianni inkhel dangh Atletico Madrid-in Celta Vigo laka point khat an hlawhchhuah avangin Madrid club hi panganaah an thu zui leh ta zawk a ni.
Tun thla October ni 18-ah Barcelona hian Girona an mikhual dawn a; he mi ni vek hian Sevilla-in Mallorca an hmachhawn thung ang.