Legal Services Day hmang
Mizoram State Legal Services Authority-a thawktute chuan Ningani khan Legal Services Day denchhenin Aizawl khawpui lunlai, Millennium Centre leh a chhehvelah dan chungchang inziahna lehkhabu an sem.
India sawrkarin The Legal Services Authorities Act 1987 a pass a, 1995 November 9 khan hman tan a ni. He Act hman tan ni hi Legal Services Day-ah hmang chhunzawmin kumtin dan chungchang inzirtirna leh khawtlang thatna turin hman thin a ni.
Legal Services Day denchhen hian Mizoram State Legal Services Authority (MSLSA) leh High Court Legal Services Committee Gauhati High Court tangdun chuan Gauhati High Court Aizawl Bench hmunah hun an hmang.
MSLSA executive chairman, Gauhati High Court judge Justice Michael Zothankhuma chuan Legal Services Authority din chhoh dan, mipui tana hna a thawh thin dan bakah Mizoram chu ruihhlo tawlhna kalkawng a nih avangin ruihhlo dona kawnga tan tlan a ngaih dan te sawiin, court leh mipui pawhin thawhhona tha neih a tul thute a sawi bawk. Environment humhalh a tul thu te, kum 10 chhungin Tlawng lui chu zaa 50 in a tlem tawh thute, ramngaw humhalh turin mipui tan tlan a ngaih thu te a sawi bawk.
High Court Legal Services Committee Gauhati HC chairman, Gauhati High Court judge Justice Nelson Sailo pawhin High Court Legal Services Committee hnathawhte sawiin lok adalat an kalpui dan leh a thlawna ukil rawihsak chungchang a sawi a ni.
Gauhati High Court judge Justice Marli Vankung chuan High Court hnathawh leh Legal Services Authority hmalakna a sawi.
He hunah hian legal services provider-te hnenah lawmpuina thilpek hlan a ni a. Best Community Para Legal Volunteer – HL Biakmawia, Rengdil Mamit district; Best Student Para Legal Volunteer – David Malsawmtluanga, Govt. Mizoram Law College; Best Panel Lawyer in Magistrate Triable Cases (Civil & Criminal) – H Vanlallawmzuala, advocate; Best Panel Lawyer in Sessions Triable Cases (Civil & Criminal) – K. Laldinliana, advocate te an ni.
District hrang hranga District Legal Services Authority-te pawhin Legal Services Day denchhen hian jail-ah leh hmun hrang hrangah mipuite dan zirtirna atan an hmang a ni.