Legislative Assembly-in a ral
Kumin July 21-a thi Dampa bialtu MLA Lalrintluanga Sailo chu Mizoram Legislative Assembly member-te chuan Thawhlehni khan Aizawl Luangmuala an chenna inah an ral a, death gratuity hlan a ni. Ralna inkhawm hi Assembly speaker Lalbiakzama’n kaihruaiin, Home minister K Sapdanga’n hunserh a hmang a. Mizoram Legislative Assembly additional secretary Lalthangmawia’n Section 16 of the Mizoram Salaries, Allowances and Pension of MLA Act 1999 angin Lalrintluanga Sailo nupui Lalbiakthuami hnenah death gratuity cheng nuai 15 a hlan.
Ralnaah hian deputy speaker Lalfamkima, leader of opposition Lalchhandama Ralte bakah MLA C Ngunlianchunga leh Dr K Beichhua ten thlahna thu an sawi a. Ralnaah hian Legislative member Aizawla awm mekte leh Assembly Secretariat hotute an tel a ni.
MLA Lalrintluanga Sailo hi Zote khaw lal ni thin, Lalnguauva Sailo leh Lalhmingliani te fapa niin 1960 June 13 khan Durtlang Hospital-ah a piang a. Kum 1975 ah Ch Chhunga High School atangin pawl 8 zir zoin 1976 khan, kum 16 mi a nihin India laka zalenna sualtu, MNF zawmin hnam sipaiah a tang a, remna leh muanna a awm tak hnuin khawtlang enkawlna lamah a inhmang zui nghal a ni.
Kum1990 khan MNF ticket-in Luangmual Village Council member atan thlantlin niin, Village Council President a ni nghal a, VC-ah hian term li thlan tlin niin, term thum VCP, term khat member a ni.
Kum 2003 khan MNF Gen. Hqrs. ah joint secretary atan ruat niin, kum 2009-ah general secretary atan ruat a ni. Kum 2018 leh 2023 inthlanpuiah Dampa bial atangin MLA-a thlantlin a ni. Ram leh hnam tan thahnemngai taka a thawh laiin, natnain a tlakbuak a, kumin July 21 khan Max Hospital Delhi-ah a thi a ni.