Lehkhabu chhuah leh sum

By Rinfela Zadeng

Miin lehkhabu an chhuah hian, harsatna lian tak an tawh hmasak ber chu – lehkhabu chhuahna tur sum leh pai hi a ni. Mizoramah hian lehkhabu chhuah avanga hausakpui ta hi mi sawmhnih pawh an tling awm lo e. Tin, lehkha ziaktute hi mi hausa leh nei nung tak, sum leh pai lama buai lo hi a tlem zawk an nih pawh a rinawm a. Engtiang chiahin nge kan lehkhabu ziaka chhuahtute hian harsatna an tawh thin hi mi tam tak chuan kan hriatpui kher awm lo e. Lehkhabu pakhat chhuah tur hian cheng singnga atanga nuaikhat inkar vel hi sen ral a ni thin a, chu chuan lehkhabu tlangzarh sen so leh a kaihhnawih a huam tel lo.

Lehkhabu chhuahtute – Publisher
Khawvel ram dangah chuan lehkhabu chhuahtu hlun, publisher kan tih mai te hi an tam em em a. Chungte chuan lehkhabu ziaktute hnen atangin lehkhabu chhuah tur an lei a. Sum leh pai senso ngai zawng zawng buaipuiin lehkhabu an chhuah a; a ziaktu tana lehkhabu kha va zawrh emaw hralhna zawnga va buai kha a ngai ve lo. India rama lehkhabu ziaktu lar tak kan neih, ‘Half Girlfriend’ tih thawnthu ziaktu Chetan Bhagat lehkhabu te hi Rupa Publications India Pvt. Ltd. chhuah a ni hlawm a. Khawvel pum huapa lehkhabu lar Harry Potter, J. K. Rowling ziah te kha Bloomsbury Publishing-in a chhuah a ni tih kan hre vek awm e. Chutiang chuan ram dang leh hmun dangah chuan lehkhabu hi lehkhabu chhuahtu rintlak tak tak te hian an chhuah thin a. Mizoramah erawh chuan a ziaktute hian mahniin an inbuaipui a; lehkhabu chhutna neitute nen inbe remin a ba thlauin harsa takin lehkhabu hi an tichhuak ve hram hram a ni.

Hma kan sawn

Tunah hian Mizoram pawh hian hma kan sawn ve ta hlek hlek a; lehkhabu chhuahtu – Publishser/Publishing House rintlak kan nei chho ve tan a, a lawmawm hle. Fraser Media & Publication te, Mizoram Publication Board te, Synod Literatute & Publication Board te, In Lehkha adt te hi kan hriat lar te an ni ang a. Chutih rual chuan Publication Board anga awm kher lo, tlawmngai leh hlawkna um loa mi lehkhabu lo chhuah thin Gilzom Offset, Samaritan Printer, Blue Mountain Offset Printer, Lengchhawn Press, Zorin Compugraphics adt te an awm bawk a. Heng kan sawi tak te khian lehkhabu ziaktute harsatna hre rengin, sum leh paia hlawkna um miah loin lehkhabu an chhuah thin a, a lawmawm hle.

A that ve a ngai
Khawvel ram dang chuan lehkhabu chhuahtu tha an nei kan tih rual hian, an lehkhabu chhuah tur erawh an duh tuiin, lehkhabu tha an chhuah thin a. Lehkhabu tha chhuah tur chuan a ziaktuin mawhphurhna lian tak a nei thung. Lehkhabu tha lutuk lem lo, hralh kal lo tur leh hlawhtlinpui loh tur chu an chhuah ngai meuh lo a ni. Mizoram Publication Board pawh hian lehkhabu an endik hnuah, chhuah tlaka an ngaihte chu sum leh paia tanpuiin an chhuahsak thin a nih hi. Chuvangin lehkhabu kan tichhuak ve dawn a nih pawhin, chhuah tlak leh rintlak, mi dangte chhiar tlak ni tura buatsaih hi a ziaktu mawhphurhna liau liau a ni. Chutih rualin lehkhabu ziak tir, hmasawnna tur tam tak la nei kan ni thei a; zam miah loa hmalam pan zel tur pawhin kan infuih nghal a ni.

Lehkhabu zuartute
Tun laia khawvelah mihring kan buai tawh a, lehkhabu lei tura lehkhabu dawra va kal hman lo mi tam tak kan awm tawh. Chuvangin Social Media kaltlanga lehkhabu zuar, kan ina min dahsak thei hi an awm teuh tawh a. Chung zingah chuan FIT Lehkhabu dawr, Lehkhabuk, The Book Cafe Aizawl, Buannel Reads adt te hian Mizoram chhung leh ram dangah pawh min thawnchhuahsak thei a. Lehkhabu mamawh kan neih te hi anni kaltlang hian awlsam taka lei theih reng a ni. Chutih rualin Synod Bookroom, Baptist Book Room leh Mizorama lehkhabu zuartu hlun tak tak te chu kan hmelhriatsa an ni awm e.

Min lo ‘present’ ve
Mizote hi hnam tlawmngai, mi dangte tanpui duh leh thiante ngamtlak hnam kan ni a. Kan thiante leh kan hmelhriat tha te’n lehkhabu an tihchhuah hian a thlawna lo dawn ve kan inbeisei thin. A thlawna dawngtur leh pek phu ngawih ngawih hi chu an awm a; chutiang mi chu lehkhabu ziaktute pawhin an hai lo. A tira kan sawi tawh ang khan lehkhabu hi sum leh pai tam tak ba chunga mi khawngaihna dila chhuah a ni a. Chuvangin kan thian tha tak tak te hi a thlawna neih sak tum loin sum leh pai senga leisak tum ila. An lo hralh that theihna tura thahnemngaihpui te hi tum zawk ila, an tan malsawmna kan lo ni zual ang. A thlawna min pek an tum pawha mi dang aia man to zawka leisak te hi tum ila, chu chu kan thiante tana kan hlutna tizualtu a ni ang.
Mizote’n lehkhabu chhiar tur tha kan neih zel theihna turin kan lehkhabu ziaktute leh a chhuahtute hian tan lo la sauh sauh se la. Mipuite pawhin lehkhabu leh chanchinbute hi chhiar uar ila. Lehkhabu leh chanchinbu man atan hian kan sum leh pai pawh seng ui lo ila; You Tube, Facebook leh WhatsApp bakah lehkhabu leh chanchinbu atang te hian finna i zir belh zel ang u tiin kan insawm a ni.