Lehkhabu khawn khawm semchhuak

Lehkhabu khawn khawm semchhuak
Lunglei district bawrhsap bultuma Book Nest Initiative hnuaia Lungsen Aspirational Block-a zirlaite tana zirlaibu, thawnthubu leh lehkhabu khawnkhawm chu Thawhtanni khan Lungsen Block chhunga sikul hrang hranga sem turin bawrhsap Navneet Mann leh YMA Sub-Hqrs Lunglei president K Lalfakzuala ten an vailiam.
Bawrhsap chuan bawrhsap pisa bakah sawrkar department – School Education, UD&PA, NULM/ self help group (SHG), YMA Sub-Hqrs leh Branch nen tanghoa hlawhtling taka lehkhabu khawn khawm a ni leh thawn chhuah tura peihfel a ni chu lawmawm a tih thu a sawi.
Book Nest Initiative chu NITI Aayog hnuaia Aspirational Block Programme hmalakna leh Nasha Mukt Bharat Abhiyaan hnuaia ruihhlo do beihpui thlak tihhlawhtlinna pakhat a ni, tiin, zirna tihhmasawn kawnga mipui vantlangin ngaihtuahna leh tha an sen theihna tura chawh thawh, mi tam tak tana hnawksak chang thei lehkhabu hlui hman tangkai bakah thalaiten ruihhlo buaipui loa zirna leh nunphung hrisel an um zawk theihnana zirtir chu a tum a ni tih a sawi a ni.
Lunglei veng chhunga in awm zat atanga chhuta lehkhabu khawn chhuak tha zual veng 5-a YMA branch leh SHG hnenah lawmman hlan niin, a bak YMA branch leh SHG tel zawng zawng lawmman pek an ni bawk.
Book Nest Initiative hnuaiah hian YMA Sub-Hqrs Lunglei hnuaia Lunglei khawpui chhung YMA branch 19 in lehkhabu 11034 khawn chhuakin, Lungsena YMA branch pathum atangin lehkhabu 22, UD&PA atangin lehkhabu 312 leh AstroScape neitupa Aryan Mishra hnen atangin lehkhabu 106 dawn a ni a; a vaiin lehkhabu 11474 khawm a ni.
Lehkhabu thawn chhuah hi Lungsen Block-a school 61 (primary 27, middle 27, comprehensive 3, high school 3 leh higher secondary 1) ah sem darh a ni dawn a. Heng school-ah hian lehkhabu chhuar pawh siam sa vek a ni.