LEHKHABU PHO RUN PUI – 3
Mahmuaka Chhakchhuak
Mizo Writers Association (MWA) huaihawtin Vanapa Hall Hulhliapah Sept. 11 – 16, 2023 chhung khan Lehkhabu Pho Runpui Vawi thumna neih a ni leh ta a, lehkhabu chi hrang hrang sang chuang tehmeuh pho chhuah leh a ni.
Lehkhabu Pho Runpui (LPR) hi tangkai leh hlawk taka buatsaih a lo ni tawh thin a, a buatsaih tute lam chuan hlawkna nei lo mahsela lehkhabu ziak tute leh pho tute lam chuan hlawkna nasa tak an nei thungin chutiang tura buatsaih chu a ni bawk a. A tanni, a hawnna niah hian Lehkhabu 17 chu a hlawma tlangzarhna hun buatsaih a ni a, chung Lehkhabu tlangzarh tharte chu hengte hi an ni;
Ka hla phuah leh lehlinte – Rozama Chawngthu
Thinlung Tuihna – Tharbawihi Colney
Ruam Rai Thuruk – C. Lalnunchanga
Mizo Culture – B. Lalthangliana
Tales of Man Singh – Lalzarzova Khiangte
(Letlingtu)
Sunsets and Lovers – Debbie Rinawmi
Lo neitu fapa – R. Vanhnuaithanga
Ka rawn fang leh – C. Laizawna
Krismas Drama – Mamawii Colney
Manipur Rambuai – Tluanga Chhakchhuak
Kei leh Salem Boarding – C. Rochungnunga
Ziakfung Zalen – H. Lalawmpuia
Naupang enkawl leh
kaihhruai dan – C. Lalrinchhana
Zukbual – R. Nelson
Mizote Thlang Tlak dan – C. Chhuanvawra
Khawhar hla bu – C. Chhuanvawra
Tuipui ral fan thu – Mizo Writers Assn
Heng Lehkhabu bakah hian midang ziak leh buatsaih Lehkhabu thahnem tak pho chhuah a ni bawk a, hriat theih chinah MWA (Mizo Writers Association) member 115 lehkhabu pho chhuah a niin Lehkhabu hi chi hrang hrang 1200 vel ni bawka hriat a ni.
LPR-3 chhungah hian ni tina Lehkhabu hralh tam dan chhinchhiah zel a niin ni ruk chhunga Lehkhabu pho chhuahah khan hengte hi Lehkhabu hralh kal zual Top Ten –te an ni a;
I Thu ber lo – Dr. C. Lalhrekima
Mizoram Politics
Bihchianna – K. Remruatfela
Mala Malna – Loretta Khawlhring
Ram Kalsiam – Mahmuaka Chhakchhuak
Manipur Rambuai – Tluanga Chhakchhuak
Theih Ni Se – Zosangzuala
(Red Wheelchair)
Pherzawl Titi – L. Keivom
Ziakfung Zalen II – H. Lalawmpuia
Thinlung Tuihna – Tharbawihi Colney
Ruam Rai Thuruk – C. Lalnunchanga
Organizing Secretary report-a kan hmuh danin LPR-3 chhung hian Lehkhabu zawrhna atanga sum leh pai hmuh hi a vaiin Rs. 1,022,178/- a ni a, a lawmawm hle a ni.
He LPR-3 hi thil lawmawm tak a niin Lehkhabu ziaktute tan phei chuan lawmna tur hi sawi tur tam tak a awm thei ang. A bik takin Lehkhabu ziaktu kum lama naupang zawkte tan a vanneihthlak ngawt mai. A leitu lam tan pawh hetianga hmun khata Lehkhabu sang chuang pho chhuah hi thil lawmawm tak a niin man tlawm zawka lei tur a ni lehzel hi a vanneihthlak. Kum upa lam leh zirlaite tana Pu B. Lalthangliana kutchhuak lehkhabu chi hrang hrang pho chhuah tur alo awm hi a lawmawm hle bawk a, Lehkhabu thar ber ber leh hlui tak tak, chhut nawn leh pawh beiseiawm loh tak tak tur pho chhuah a niin hi thil lawmawm tak a ni. Pakhat chauh han sawi lang ila: ZORAM ENCYCLOPEDIA (Zoram Tinreng Bu) Pu B. Lalthangliana ziak kha kum 2003 daih tawha ziak nimahsela man tlawm taka zawrh chhuah a ni a, hralh a kal hle mai. A bu lah chu an dahna lam a zir loh avangin a hmelhem deuh a, thenkhatte tan chuan zawrh chhuah tlak loh tur ang hiala ngaih tur pawh a ni thei ang. Nimahsela a chhung thu avang zawk chuan an duh hle mai thung a, pho chhuah ang ang chu hralh zawh a ni hialin ka hria.
Pawn lam atanga Lehkhabu pho chhuah thlir tura rawn kal tam tak zingah zawn bik neia rawn kal an awm rualin a hmuna duhthlang chawp tam tak an awm bawk. Chungte chu a zuartu lamin an lo dawnsawn dan a zirin an lei chawp mai deuh ni pawhin a hriat. Lehkhabu hi thawmhnaw zawrh anga zawrh chi a nihna lai a awm a, hriat chian sa loh phei chu hmanhmawh lo taka thlir hmasak ngai ve tak a ni. Lehkhabu ziaktu hming langsar tak tak an awm a, anni kutchhuak chu hralh pawh a kal nge nge a, a zuartu lam tan pawh comment hran an ngai lem lo. Ziaktu hming langsar lem lo leh hriat lar loh tam tak an awm bawk a, anni tana hetianga an kutchhuak Lehkhabu phochhuahna hun remchang a awm hi a vanneihthlak ngawt mai. MWA hruaitu zingah nitin uaptu an awm thei reng kha a lawmawm ngawt mai bawk a. Hmun hrang hrang atanga rawn kal zingah thlalakpui tu engemawzat an awm bawk a ni.
Lehkhabu chhiar hi kan peih tawh lo han ti bawk thin mah ila, thalai zingah lehkhabu tha ngaihven kan la tam zia tun LPR-3 ah hian hmuh theihin a lang a, a lawmawm hle a ni. Cheng sang tam tak senga pawm haw tawn tawn tur khawp lehkhabu lei hmel hmuh chu thil lawmawm tak ava ni em. A buatsaihtu MWA hruaitute hnenah lawmthu sawi tur tam tak a awm a, hetiang thil buaipui tura an ngaihtuahna an seng leh Chunglamin min hlawhtlin tir zel bawkte hi lawmthu sawina tur ber a ni bawk.