Lehkhabu thehdarhtu pawimawh State Library

Mizoram State Library hlutna hian hriat a hlawh tawk lo mai thei a, a hria apiangin an ngaihlu ang.
Mizorama library lian ber nia rin, lehkhabu ngah ber nia ngaih a ni a, an lehkhabu hi mi thahnem takin an chhiar a ni mai lo, Mizoram hmun hrang hranga lehkhabu an thehdarh hi Mizoram tan thil hlu a tling.
Mizoram State Library hian library engemaw zat an chawm a, an hnena inziak lut ‘recognised library’ 511 an awm. Chung library hrang hrangte hnenah chuan lehkhabu an sem thin a, kum khatah lehkhabu thahnem tak an pe thin. Financial year apiangin lehkhabu engemaw zat an lei a, chu chu an sem darh leh thin a ni.
Tunlai hian 2023-24 chhunga an lehkhabu leite a man an pe mek a, Mizo kutchhuak lehkhabu 188 an lei.
Lehkhabu pakhat hi bu thahnem tak an lei thin a, hei hi lehkhabu ziaktute tan a hlu hle. Mizo lehkhabu market pawimawh a tling.
Anmahni library-ah lehkhabu 72425 an nei a, naupang lehkhabu bik pawh 5924 an nei. Mizo, English leh Hindi lehkhabute an nei a, Hindi lehkhabu hi sing hnih dawn an nei. Chanchinbu an la bawk.
An chhinchhiah danin, an library-ah hian member sing dawn an awm a, puitling 8104 leh naupang 1400 an ni. Member-te hian vawi khatah lehkhabu pathum an hawh thei a, member ni lote’n a hmunah lehkhabu an duh duh an chhiar thei bawk.
State Library enkawltute sawi danin, library tlawhtu hi an awm reng a, a tam ber chu zirlai an ni. Zirlaite’n an zirlai atana tangkai tur lehkhabu ena chhiar nan an hmang a, hna zawng laite’n chutiang atan chuan an hmang bawk. A hmuna lehkha zir hi ni tinin mi engemaw zat an awm thin.
An Hindi lehkhabute erawhin chhiar a hlawh lem lo a, hnam dang pawh kal ve thin mah se Hindi lehkhabu hi an chhiar lem lo an ti.