Lei che avanga Sateek bazar hmun himna tur rel

Aibawk Cluster huamchhung Sateek Wholesale Market -cum- Guest House chu tunhnai ruahsur avangin building bulthuta leimin thlengin harsatna a thlente chu Inrinni khan Rural Development minister Lalruatkima chuan a enfiah a; hmalak chhunzawm tulte department hotute leh khawtlang hruaitute a sawipui.
Minister chuan Sateek SPMRM Wholesale Market-in leimin avanga harsatna chu department thawktute bakah khawtlang hruaitute nen building chhanhim tura tan lak tlan a tul thu leh nitina a dinhmun ngaihven tlan a tul thu a sawi a. Leilung chezia hriatlawk vek sen a ni lo, tiin, tun dinhmunah building himna tura tulte ngaihven thuai ngaihpawimawh hmasak a nih thu leh fur zawh veleh hmalakna dang pawh kalpui tum a ni tih a sawi a ni.
Tunhnai ruahsur avanga leiminin Sateek SPMRM Wholesale Market building dinhmun a tih derthawn dante enfiah a ni a. Chhiatna nasa zawk a thlen lohna’na hma lak nghal tulte sawiho niin, tui chhe paihna siam danglam, tuiput lo tura siam leh building leh a chhehvel tuihul taka siam chu hmalak hmasak tul a nih thu sawi a ni. Mipui him zawkna’n tun ruahtui tlak hun chhung hun engemawchen chu luah rih loa dah leh, a himna tur lam hawi hna thawh nise tih a ni a. Ngun taka vil chhunzawma chanchin ngaihven zui zel nise, an ti bawk.
Sateek Wholesale Market -cum- Guest House hi SPMRM sum, nuai 350 senga sak niin, 2022 October 14 khan hawn a ni a. Zopa chhiara chawng li niin, bazar bakah mikhual thlenna, lirthei dahna, canteen, quarters leh thildang a awm a ni.